Beerschot staðfestir komu Nökkva

Dalvíkingurinn skrifaði undir þriggja ára samning við félagið með möguleika á eins árs framlengingu.

Nökkvi lék sinn síðasta leik fyrir KA þegar liðið gerði 2-2 jafntefli við Fram á sunnudaginn. Hann er markahæstur í Bestu deildinni með sautján mörk. Auk þess skoraði hann sex mörk í Mjólkurbikarnum þar sem KA-menn komust í undanúrslit.

Beerschot er í 2. sæti belgísku B-deildarinnar með sjö stig eftir fjórar umferðir. Næsti leikur liðsins er gegn Lommel á föstudaginn.

Nökkvi er þriðji Íslendingurinn sem semur við Beerschot. Guðmundur Benediktsson var á mála hjá félaginu á árunum 1991-94 en þá hét það Germinal Ekeren. Jón Guðni Fjóluson lék svo með liðinu 2011-12.