Fótbolti

Elías og félagar fara í riðlakeppni Evrópudeildarinnar

Hjörtur Leó Guðjónsson skrifar
Elías Rafn Ólafsson og félagar hans misstu af sæti í riðlakeppni Meistaradeildarinnar, en fara beint í riðlakeppni Evrópudeildarinnar.
Elías Rafn Ólafsson og félagar hans misstu af sæti í riðlakeppni Meistaradeildarinnar, en fara beint í riðlakeppni Evrópudeildarinnar. Jose Manuel Alvarez/Quality Sport Images/Getty Images

Elías Rafn Ólafsson og félagar hans í danska liðini Midtjylland eru úr leik í forkeppni Meistaradeildar Evrópu eftir 1-3 tap gegn Benfica í kvöld. Evrópuævintýri liðsins er þó ekki lokið þar sem tapið þýðir að Midtjylland fer beint í riðlakeppni Evrópudeildarinnar.

Benfica vann fyrri leik liðanna 4-1 í Portúgal og því ljóst að brekkan væri brött fyrir Elías og félaga.

Elías var á sínum stað á milli stanganna hjá danska liðinu, en það kom ekki í veg fyrir að Enzo Fernandez kæmi gestunum í Benfica í forystu á 23. mínútu.

Henrique Araujo tvöfaldaði svo forystu gestanna snemma í síðari hálfleik áður en Pione Sisto minnkaði muninn fyrir Midtjylland.

Það var svo Diogo Goncalves sem gerði endanlega út um einvígið þegar hann skoraði þriðja mark Benfica á 88. mínútu. Niðurstaðan því 1-3 sigur Benfica sem er nú komið í lokaumferð forkeppni Meistaradeildar Evrópu. Elías og félagar þurfa hins vegar að gera sér það að góðu að fara í riðlakeppni Evrópudeildarinnar.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.