Enski boltinn

Nýr aðstoðarmaður Ten Hag aðstoðaði Sir Alex Ferguson í þrennunni frægu

Óskar Ófeigur Jónsson skrifar
Alex Ferguson og Steve McClaren unnu saman í tæp þrjú ár á Old Trafford. Nú aðstoðar McClaren nýja stjóra Manchester United.
Alex Ferguson og Steve McClaren unnu saman í tæp þrjú ár á Old Trafford. Nú aðstoðar McClaren nýja stjóra Manchester United. Getty/Peter Wilcock

Manchester United staðfesti í dag hverjir munu aðstoða nýja knattspyrnustjóra félagsins en Hollendingurinn Erik ten Hag er nú tekinn við liðinu.

Erik ten Hag var meðal áhorfenda á Selhurst Park í gær þegar Manchester United tapaði á móti Crystal Palace í lokaleik sínum á tímabilinu.

Nýju aðstoðarmennirnir sátu þar við hlið hans eins þeir eru Mitchell van der Gaag og Steve McClaren.

Ten Hag vildi fá þá með sér en hann hefur unnið með þeim áður. Van der Gaag var aðstoðarmaður hans hjá Ajax og þá vann ten Hag sem aðstoðarmaður hjá McClaren hjá Twente.

McClaren er líka að snúa aftur á Old Trafford nú tuttugu árum eftir að hann starfaði þar síðast.

McClaren var nefnilega aðstoðarmaður Sir Alex Ferguson frá 1999 til 2001 og tók meðal annars þátt í þrennutímabilinu ógleymanlega. Hann kom snemma árs og þá í staðinn fyrir Brian Kidd.

United vann enska meistaratitilinn á öllum þremur tímabilunum sem McClaren starfaði sem aðstoðarmaður Ferguson.

McClaren tók seinna við enska landsliðinu, hann gerði Twente að hollenskum meisturum og var síðast yfirmaður knattspyrnumála Derby County áður en félagið fór í gjaldþrotameðferðina.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.