Íslenski boltinn

„Ég er bara svo ánægð að hún komi heim“

Óskar Ófeigur Jónsson skrifar
Alexandra Jóhannsdóttir var búin að skora eftir aðeins fimm mínútna leik í sigrinum á KR.
Alexandra Jóhannsdóttir var búin að skora eftir aðeins fimm mínútna leik í sigrinum á KR. S2 Sport

Bestu mörkin ræddu endurkomu Alexöndru Jóhannsdóttur í íslensku deildina en hún kom til Breiðabliks á láni á dögunum og skoraði í sigri á KR í fyrsta leik. Fyrst var spilað viðtal Vals Páls Eiríkssonar við landsliðskonuna.

„Ég fékk þetta ekki staðfest fyrr en síðasta laugardag en þetta er búið að vera aðeins í umræðunni, svona þannig lagað, það er svolítið síðan að ég bað um að fá að fara en ég fékk ekki staðfest fyrr en í síðustu viku,“ sagði Alexandra. En þurfti hún að setja mikla pressu til að ná skiptunum í gegn?

„Já, ég þurfti að pressa smá á þá. En ég skil þá svo sem alveg að vilja ekki hleypa mér strax þegar það er stutt eftir af mótinu og við erum í bullandi séns á Meistaradeildarsæti. Ég skil svo alveg að þeir vilji ekki hleypa mér út ef það gerist síðan eitthvað fyrir mannskapinn,“ segir Alexandra.

„Frábært að fá Alexöndru inn í deildina en áttir þú von á þessu Sonný,“ spurði Helena Ólafsdóttir.

Klippa: Bestu mörkin: Heimkoma Alexöndru Jóhannsdóttur

„Ég er bara svo ánægð að hún komi heim. Hún fékk að koma til að fá leiki og koma sér í leikform. Við viljum hana heila á Evrópumótinu í sumar. Gott líka fyrir Breiðablik að fá hana inn á miðjuna,“ Sonný Lára Þráinsdóttir, sérfræðingur í Bestu mörkunum.

Alexandra fór út í atvinnumennsku til Frankfurt í Þýskalandi eftir að hún varð Íslandsmeistari með Breiðabliki sumarið 2020.

„Ég held pottþétt að þetta sé búið að vera svolítið erfitt fyrir hana en ég held samt líka að þetta sé eitthvað sem hún eigi eftir að læra svo ofboðslega mikið af. Ég held að hún myndi aldrei vilja breyta þessu enda ekkert slorlið sem hún er að spila fyrir,“ sagði Lilja Dögg Valþórsdóttir, sérfræðingur í Bestu mörkunum.

Það má sjá alla umfjöllunina um Alexöndru hér fyrir ofan.




Fleiri fréttir

Sjá meira


×