Fótbolti

Real Madrid fjórum stigum frá titlinum | Markalaust hjá Atletico

Atli Arason skrifar
Benzema skoraði ekki í kvöld, þrátt fyrir að fá tvær vítaspyrnur.
Benzema skoraði ekki í kvöld, þrátt fyrir að fá tvær vítaspyrnur.

Real Madrid átti ekki í miklum vandræðum með Osasuna í spænsku úrvalsdeildinni í knattspyrnu, LaLiga. Madrídingar unnu 1-3 útisigur þar sem það ótrúlegasta var að Karim Benzema skoraði ekki.

Madrid skoraði fyrsta mark leiksins á 12. mínútu og það gegn gangi leiksins eftir frábæra byrjun heimamanna. David Alaba náði að pota boltanum yfir línuna til að koma Real Madrid 0-1 yfir.

Osasuna var þó ekki lengi að jafna þegar hin króatíski Ante Budimir skoraði eftir frábært liðs mark, einungis mínútu eftir að Real komst yfir. Marco Asensio kom Madrídingum svo aftur í forskot rétt fyrir hálfleik.

Gestirnir fengu tilvalið tækifæri til að tvöfalda forskot sitt í tvígang, þegar þeir fengu tvær vítaspyrnur með sex mínúta millibili rétt áður en klukkutími var liðin af leiknum. Karim Benzema tók báðar spyrnurnar en í bæði skipti sá Sergio Herrera, markvörður Osasuna, við Benzema og Real því áfram bara með eins marks forystu.

Osasuna gerði hvað þeir gátu til að jafna leikinn og færðu lið sitt ofar á völlinn sem gerði að verkum að Lucas Vázquez gulltryggði sigurinn úr skyndisókn á sjöttu mínútu uppbótatíma síðari hálfleiks og lokatölur urðu 1-3.

Atletico gerði á sama tíma markalaust jafntefli við Granada í afar bragðdaufum leik þar sem lítið sem ekkert er að greina frá annað en þrjú samanlögð skot á markramman í heild frá báðum liðum í gegnum allar 90 mínúturnar.

Real Madrid er því með 16 stiga forskot á Atletico toppi deildarinnar þegar bæði lið eiga fimm leiki eftir. Barcelona er stigi á eftir Atletico og á tvo leiki inni á liðin tvö frá Madrid. Real þarf því einungis fjögur stig í viðbót ef Barcelona tekst að vinna báða leikina sem liðið á inni.




Fleiri fréttir

Sjá meira


×