Gæti reynst þungt högg að útiloka Rússa frá SWIFT

Fanndís Birna Logadóttir skrifar 28. febrúar 2022 12:29

Jón Bjarki Bentsson, aðalhagfræðingur Íslandsbanka. Vísir/Egill

Vesturlöndin hafa undanfarna viku gripið til umfangsmikilla refsiaðgerða gegn Rússum og er nýjasta útspilið að loka fyrir aðgengi Rússa að SWIFT kerfinu svokallaða. Hagfræðingur segir að áhrifin verði líklega töluverð en hætt er við að aðgerðirnar bitni mest á almenningi.

Ríki Evrópusambandsins, Bandaríkin, Bretland, Kanada og fleiri ríki gripu til þess ráðs um helgina að loka fyrir aðgengi Rússa að SWIFT greiðslukerfinu en kerfið er notað við miðlum fjármuna milli alþjóðlegra banka. Jón Bjarki Bentsson, yfirhagfræðingur hjá Íslandsbanka, útskýrði kerfið í viðtali í Bítinu á Bylgjunni í morgun.

„Einfaldasta lýsingin er að þetta er eins og Facebook Messenger á sterum fyrir fjármálakerfið. Þetta er skilaboðakerfi sem er notað af alþjóðafjármálaheiminum til að senda skilaboð á milli um alls konar fjárhagslegar millifærslur,“ sagði Jón Bjarki.

Sem dæmi kemur kerfið að notum þegar einhver hér á landi vill senda einhverjum erlendis fjármuni en þá sendir bankinn SWIFT skilaboð til viðskiptabanka þess sem er úti.

„Þetta einfaldar svo mikið allt flæði fjármuna milli landa, peningarnir sjálfir fara ekki í gegnum Swift kerfið,“ sagði Jón Bjarki en kerfið er mjög útbreitt og langflestir bankar treysta á það þannig áhrifin eru töluverð fyrir Rússa.

„Það sem þetta hefur í för með sér að það verður í sumum tilfellum nánast ómögulegt, og í öllum tilfellum miklu flóknara, fyrir útflytjendur í Rússlandi að fá greitt fyrir orku, eldsneyti, hveiti, pálma, hvað sem þeir eru að flytja út, og að sama skapi mjög erfitt að kaupa og borga fyrir alls konar innflutning,“ sagði Jón Bjarki. „Þannig þetta sker þá.“

Allir muni finna fyrir aðgerðunum

Í síðustu viku gripu Vesturlöndin til umfangsmikilla refsiaðgerða gegn Rússum en meðal annars voru eignir rússneskra banka frystar.

Jón Bjarki segir að aðgerðirnar styðji hvor aðra og bendir þannig á að Seðlabanki Rússlands hafi verið að safna miklum gjaldeyrisforða, sem nemur nærri 40 prósent af landsframleiðslu Rússlands.

„Einn tilgangur með þessari söfnun var að búa sig undir það að geta brugðist við einhvers konar efnahagslegum refsiaðgerðum en nú er svona sú varaleið, hún er svolítið bækluð,“ sagði Jón Bjarki. „Stór hluti af gjaldeyrisforðanum er allt í einu utan þeirra áhrifasviðs.“

Þá er ákveðin hætta á því að refsiaðgerðirnar bitni mest á almenningi í Rússlandi, til að mynda með hækkandi vöruverði. Slíkt er þegar byrjað að gerast og það hratt.

„Þetta er að vinda svo hratt upp á sig að það munu allir í Rússlandi finna fyrir þessum aðgerðum býsna fljótt.“

Rússland Innrás Rússa í Úkraínu Bítið Íslenskir bankar

Tengdar fréttir

Vaktin: Tugir borgara sagðir hafa fallið í klasasprengjuárás

Sókn rússnesks herliðs að úkraínsku höfuðborginni Kænugarði hélt áfram í nótt og í morgun, þó hún hafi verið umfangsminni en áður. Borgin virðist þó umkringd af rússneskum hermönnum en Rússar hafa sagt að almennir borgarar megi flýja og verði óáreittir.

28. febrúar 2022 06:13

Rúblan hríðfellur og bann á sölu á eignum í Rússlandi

Rússneski seðlabankinn bannaði í morgun sölu erlendra aðila á hlutabréfum og eignum í Rússlandi.

28. febrúar 2022 08:42

Grípa til umfangsmikilla refsiaðgerða en ganga ekki eins langt og sumir myndu vilja

Leiðtogar Bandaríkjanna, Bretlands og Evrópusambandsins tilkynntu síðdegis um refsiaðgerðir gegn Rússum vegna innrásarinnar í Úkraínu. Þrátt fyrir að ríkin fullyrða að þeirra aðgerðir séu þær hörðustu og umfangsmestu í sögunni var ekki ákveðið að loka fyrir aðgengi Rússa að alþjóðlega SWIFT-greiðslukerfinu, sem flestir eru sammála um að myndi reynast mikið högg.

24. febrúar 2022 23:20

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir