Mikil eftir­vænting á Hellu fyrir opnun Bæjarins bestu

Umsókn fyrirtækisins um starfsleyfi var tekin fyrir á afgreiðslufundi byggingarfulltrúa Rangárþings ytra þann 5. nóvember. Þar staðfesti byggingarfulltrúi að umrædd starfsemi væri í samræmi við samþykkta notkun húsnæðisins. Hann gerði ekki athugasemdir við tiltekna starfsemi í húsinu en áréttaði að Bæjarins bestu myndu bera ábyrgð á því að tryggja að húsnæðið uppfyllti skilyrði um bruna- og mengunarvarnir og að neysluvatn uppfylli kröfur um gæði vatns.

Baldur Ingi Halldórsson eigandi Bæjarins bestu segir staðinn formlega opna eftir helgi. Í dag hafi verið mjúk opnun.

„Við fáum líklega leyfi á mánudaginn. Við ætluðum að opna í sumar en það tafðist þannig við erum bara í rólegheitum búin að vera að gera hann fínan og ætlum að gera hann enn fínni fyrir sumarið.“

Baldur Inga segir alltaf hafa þótt spennandi að opna stað á þessum slóðum. Þetta sé fjölfarnasti hluti landsins og margir ferðamenn, innlendir og erlendir, sem fari þarna um. Nýi staðurinn sé við veginn og í alfaraleið.

„Svo er húsið bara svo fallega rautt,“ segir hann og að það hafi verið unnið að því að merkja húsið.

Hann segir Hellu vaxandi bæjarfélag og hann sé spenntur að bjóða heimamönnum og gestum upp á pylsur.

„Það eru allir rosa spenntir og glaðir að fá meira úrval. Ég hlakka til að þjónusta fólk.“

Hann segir matseðilinn að vanda eina með öllu og drykki með. Mögulega verði síðar meir einnig hægt að kaupa kaldar samlokur og skyr.

„Það hefur gengið vel síðustu ár og gengur almennt vel í pylsunni. Pylsan er bara ótrúlega vinsæl hjá Íslendingunum. Þetta er þjóðarréttur Íslendinga,“ segir hann.

Baldur á ekki von á því að vinna sjálfur á staðnum en segist reglulega ætla að renna við.

„Þetta er mjög skemmtilegur staður og rosalega gott útsýni. Við keyrðum þangað í morgun og það er svo fallegt landið sem við búum á. Að keyra á fallegum degi um Suðurlandsundirlendið er eitt það flottasta í heiminum og mjög skemmtilegt að vera komin á Hellu.“