Risastór sigur fyrir Ísland og hefði verið hræðilegt að þurfa að spila erlendis

Martin viðurkenndi að hann hefði oft staðið sig betur en í sigrinum gegn Ítölum í kvöld, í undankeppni HM í körfubolta, en hann skoraði samt 23 stig og gaf sjö stoðsendingar, og spilaði 45 mínútur, sem er merkilegt í ljósi þess sem á gekk:

„Ég fór í náranum í fyrsta leikhluta og í kálfanum í öðrum. Ég hef alveg verið betri. Ég hefði átt að vera löngu búinn að ljúka leik og það sést kannski á spilamennskunni í framlengingunum tveimur. Líkaminn var oft á tíðum ekki að fylgja hausnum. En þeir eru líka bara gott varnarlið og gerðu mér erfitt fyrir. Það er margt sem ég þarf að laga fyrir sunnudaginn,“ sagði Martin.

Held að fólk átti sig ekki á því hversu góðum leikmönnum við vorum að mæta

Ísland hafði yfirhöndina lengst af en Ítölum, sem eru meðal bestu körfuboltaþjóða Evrópu, tókst að jafna metin og tryggja sér framlengingu:

„Við vorum auðvitað bara að spila á móti ógeðslega góðu liði sem verður að hrósa líka. Það sem við vorum að gera hérna er risastórt. Ég held að fólk átti sig kannski ekki á hversu góðum leikmönnum við vorum að mæta og á hvaða kalíberi þeir eru að spila, á meðan að við erum með nokkra hérna í Subway-deildinni,“ sagði Martin.

Gáfum vonandi fólkinu eitthvað

„Það er bara betra að þetta fór í framlengingu. Þetta var svo ógeðslega gaman – að spila fyrir framan fullt hús hérna. Þetta var hrikalega gaman og það er alltaf svo flott að koma heim og spila fyrir framan fólkið sitt, vini og kunningja. Það hefði verið hræðilegt að spila þennan leik erlendis,“ sagði Martin og sendi með því sneið á stjórnvöld en minnstu munaði að spila þyrfti leikinn erlendis þar sem ekkert íþróttahús á Íslandi uppfyllir kröfur FIBA.

„Vonandi erum við að gefa þessu fólki eitthvað og vonandi skemmtu allir sér vel í dag. Það var alla vega tilfinningin,“ sagði Martin.

Valencia-menn kannski ekki allt of sáttir

Hann vonast til að geta spilað gegn Ítalíu í Bologna á sunnudaginn en það er ekki víst.

„Ég ætla að vona það. Ég held að Valencia-menn verði ekkert allt of sáttir ef ég kem svona til baka eftir að hafa spilað á sunnudaginn en við sjáum bara til. Þetta er alla vega risastór sigur í kvöld og gefur okkur mikið andrými fyrir framhaldið,“ segir Martin en Ísland tók risastórt skref áfram á næsta stig undankeppninnar með sigrinum í kvöld, eftir að hafa einnig unnið Holland á útivelli í haust.

Liðið hefur því unnið tvo leiki af þremur þegar þrír leikir eru eftir.

„Við erum komnir í mjög góð mál en viljum auðvitað vinna líka úti. Það verður erfitt. Þeir dreifðu mínútunum betur á milli sín í dag. Við þurfum að hugsa vel um okkur en sýndum í kvöld að við getum þetta.

Ég veit alveg hvernig þessi leikur verður á sunnudaginn. Annað hvort vinnum við eða þetta fer mjög illa. En við förum hér út í kvöld með hausinn uppi og ætlum að vinna á sunnudaginn. Við erum ógeðslega góðir í körfubolta,“ sagði Martin.