Leiknir og Vestri skiptu stigunum á milli sín í hörkuleik

Þrátt fyrir að Leiknismenn hafi verið sterkari aðilinn í upphafi leiks var það Pétu Bjarnason sem kom Vestra í forystu eftir 15 mínútna leik þegar hann fékk þá boltann inn fyrir vörn Leiknis og lyfti honum snyrtilega yfir Viktor Frey í markinu.

Staðan vaar því 1-0 þegar flautað var til hálfleiks, en Daníel Finns Matthíasson jafnaði metin fyrir Leikni eftir um klukkutíma leik með góðu skoti fyrir utan teig.

Leiknismenn þurftu svo að leika seinustu tuttugu mínútur leiksins manni færri eftir að markvörður liðsins, Viktor Freyr Sigurðsson, fékk að líta beint rautt spjald. Hann rauk þá langt út úr marki sínu og braut á Pétri Bjarnasyni og ekkert annað í stöðunni en að senda hann snemma í sturtu.

Þrátt fyrir að vera manni færri voru það þó Leiknismenn sem náðu forystunni þegar Daníel Finns skoraði sitt annað mark á 87. mínútu.

Það stefndi því allt í að tíu Leiknismenn myndu sigla heim 2-1 sigri, en í uppbótartíma fékk Pétur Bjarnason jöfnunarmarkið á silfurfati. Varamarkvörður Leiknis, Mehmet Ari Veselaj, gerðist þá sekur um slæm mistök þegar hann fékk sendingu til baka, en missti boltann undir sig. Pétur var fyrstur að átta sig á stöðunni og renndi boltanum í tómt markið.

Niðurstaðan varð því 2-2 jafntefli, en Leiknismenn eru nú með fjögur stig eftir tvo leiki. Vestri er hins vegar með eitt stig, en þetta var fyrsti leikur liðsins í Lengjubikarnum.