Boðaður í yfir­heyrslu vegna um­fjöllunar um Sam­herja

Þetta kemur fram hjá Stundinni, sem kveðst hafa heimildir fyrir því að minnst einn annar blaðamaður hafi verið boðaður í yfirheyrslu. Þeir séu grunaðir um að hafa með umfjöllun sinni brotið gegn ákvæðum hegningarlaga um friðhelgi einkalífs.

Í boðun frá lögreglu komi fram að Aðalsteinn muni við skýrslutökuna fá réttarstöðu sakbornings og hann hafi rétt til þess að mæta með lögmann með sér, sem lögregla muni tilnefna honum við rannsókn málsins.

Telur skilaboðin skrýtin

Í samtali við Vísi segist Aðalsteinn hissa á málinu.

„Það kemur náttúrulega bara ótrúlega á óvart að lögreglan skuli ekki vera betur að sér í hvaða lög gilda um störf blaðamanna og fjölmiðla. Það gæti ekki verið skýrara að það er lögbrot fyrir mig að gefa nokkra vísbendingu um þau gögn sem ég fjalla um. Um það gilda lög um vernd heimildamanna,“ segir Aðalsteinn.

Hann skilji því hreinlega ekki hvað búi að baki ákvörðun lögreglustjórans á Norðurlandi um að boða hann í yfirheyrslu, en lögreglumaður að norðan verður sendur til Reykjavíkur til þess að annast yfirheyrslurnar.

„En þetta er einhver vegferð sem lögreglustjórinn þarna fyrir norðan hefur áhuga á og ég fæ náttúrulega engu um það ráðið, sama hversu ótrúlega skrýtin skilaboð mér finnst það senda til blaðamanna, fjölmiðla og almennings.“

Spenntur að sjá um hvað málið snýst

Aðalsteinn segist ekki hafa fengið upplýsingar um hvaða hluti umfjöllunar hans um Samherja það sé sem lögreglan telur að geti varðað við lög. Í boðun til hans komi einfaldlega fram að grunur leiki á um að hann hafi gerst brotlegur við lagaákvæði um friðhelgi einkalífs.

„Það verður bara spennandi að heyra hvað í ósköpunum ég á að hafa gert.“

Aðalsteinn segist litlar áhyggjur hafa af málinu. Hann búi svo vel að vinna á vinnustað sem hafi lögfræðinga á sínum snærum.

Líkt og áður sagði greindi Stundin frá því að tveir blaðamenn hið minnsta hafi verið boðaðir í yfirheyrslu, en Aðalsteini er ekki kunnugt um hver hinn blaðamaðurinn er.

Uppfært klukkan 18:50: Í umfjöllun Kjarnans kemur fram að tveir starfsmenn miðilsins, ritstjórinn Þórður Snær Júlíusson og blaðamaðurinn Arnar Þór Ing­ólfs­son, hefðu verið boðaðir í yfirheyrslu hjá lögreglunni á Norðurlandi. Þeir hafi verið boðaðir í yfirheyrslu af sömu ástæðu og Aðalsteinn; vegna umfjöllunar um „skæruliðadeild Samherja.“

Uppfært klukkan 20:07: Sigríður Dögg Auðunsdóttir, formaður Blaðamannafélags Íslands, hefur sent frá sér yfirlýsingu vegna málsins. Hana má lesa hér.