Neymar sannfærður um að Netflix myndin breyti skoðun margra á honum

Neymar hefur spilað með stórliðum Barcelona og Paris Saint Germain á ferli sínum í Evrópu og er nú sjö mörkum frá því að jafna markamet Pele með brasilíska landsliðinu.

Auk þess að rúlla sér á spjöld sögunnar sem einn mesti leikari fótboltaheimsins þá hefur Neymar einnig verið gagnrýndur fyrir mikil partýhöld utan vallar. Orðspor hans er því ekki eins og það ætti að vera fyrir leikmann í hans gæðaflokki.

Í nýju viðtali við ESPN talar Neymar um orðspor sitt og að hann fái í nýrri heimildarmynd tækifæri til að breyta skoðun margra á sér.

Heimildamyndir heitir "The Perfect Chaos" og er í þremur hlutum. Þar er sérstaklega skoðað líf Paris Saint-Germain stjörnunnar utan vallar auk þess að fylgjast með vinnu föður hans í markaðsmálum.

„Þau sem þekkja mig, vita hver ég er og hvað skiptir mig máli,“ sagði Neymar í viðtali við ESPN.

„Fyrir þá sem þekkja mig ekki og eru bara að segja slæma hluti um mig þá hlusta ég ekki á þá. Ég vona samt að þeir muni horfa á heimildarmyndina og vonandi mun það breyta skoðun þeirra á mér og ímyndinni sem þeir hafa af mér. Ég vonast eftir því að þeir geti lært að líka aðeins um mig þó að það væri ekki nema örlítið,“ sagði Neymar.

Hinn 29 ára gamli Neymar segir nafn heimildarmyndarinnar táknrænt fyrir hvernig lífið hans er en það er fullkomin ringulreið að hans mati.

„Það er ringulreið af því að lífið mitt hefur alltaf verið þannig. Meira að segja síðan ég var sex mánaða. Þá lenti ég í slysi með foreldrum mínum og þá byrjaði ringulreiðin. Við náðum okkur og ég slapp alveg. Svo varð ég fótboltamaður. Það eru auðvitað mjög ánægjulega stundir en það er mikið af ringulreið í mínu lífi“ sagði Neymar.

„Ég tel að ég sé orðinn sterkur núna. Ég er sterkur maður, ekki líkamlega en í hausnum af því ég þarf að glíma við svo mikla pressu, af því hver ég er, hvernig ég spila og af því að ég er Brasilíumaður. Ég er sterkur í hausnum núna og hef unnið mikið í því að komast þangað. Það sem er líka gott við mig er að ég get ekki bara spilað fótbolta heldur hef ég líka einbeitt mér að minni andlegu heilsu“ sagði Neymar.