Fótbolti

Barcelona fær lán til að landa framherja City

Sindri Sverrisson skrifar
Ferran Torres hefur verið í aukahlutverki hjá Manchester City og er á förum frá félaginu.
Ferran Torres hefur verið í aukahlutverki hjá Manchester City og er á förum frá félaginu. EPA/Andy Rain

Barcelona hefur náð samkomulagi við Manchester City um kaup á spænska framherjanum Ferran Torres. Þessi 21 árs gamli leikmaður mun kosta Börsunga, sem átt hafa í miklum fjárhagserfiðleikum, 65 milljónir evra.

BBC fjallar um kaupin í dag og segir að enn standi ljón í veginum. Verði af kaupunum muni Barcelona hins vegar greiða 55 milljónir evra við kaupin, jafnvirði rúmlega 8 milljarða króna, og 10 milljónir evra til viðbótar síðar meir.

Barcelona hefur átt í miklum fjárhagsvandræðum sem meðal annars leiddu til þess að félagið missti Lionel Messi síðasta sumar til PSG. Samkvæmt BBC fékk félagið hins vegar nýlega bankalán til að fjármagna kaupin á Torres.

Aftur á móti þarf Barcelona að selja einhverja af sínum leikmönnum til að uppfylla reglur spænsku deildarinnar um fjárhagslega háttvísi.

Torres á sömuleiðis eftir að samþykkja vistaskiptin en ekki er talið að hann setji sig upp á móti þeim.

Torres kom til City frá Valencia í ágúst 2020 og hefur skorað 16 mörk í 43 leikjum fyrir City.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.