Sigurmarkið kom á sautjándu mínútu uppbótartíma

Djameleddine Benlamri kom gestunum yfir á 59. mínútu og það stefndi allt í það að þetta yrði eina mark leiksins.

Eftir frekar tíðindalítinn leik kom það heldur flatt upp á þjálfara Alsíringa þegar dómari leiksins, Pólverjinn Symon Marciniak, tjáði honum að hann ætlaði sér að bæta níu mínútum við leikinn.

Aðeins hafði verið skorað eitt mark og liðin höfðu gert samanlagt fjórar skiptingar, og því ekki óeðlilegt að viðstaddir hafi klórað sér í hausnum yfir því hvaðan allur þessi uppbótartími kæmi.

Mohammed Muntari jafnaði metin fyrir Katar á sjöundu mínútu uppbótartíma, en eftir að skoða þurfti markið vel og vandlega í VAR-herberginu þurfti að bæta enn frekar við leikinn.

Á 14. mínútu uppbótartíma fengu gestirnir svo vítaspyrnu, en þá hafði leikurinn verið í gangi í tæpar 104 mínútur. 

Youcef Belaili steig á punktinn þegar búið var að leika tæplega 107 mínútur af fótbolta, lét verja frá sér, en tók frákastið sjálfur og tryggði Alsíringum 1-2 sigur og þar með sæti í úrslitum Arab Cup þar sem þeir mæta Túnis á laugardaginn.

Ekki er víst að mark hafi verið skorað jafn seint í leik og markið sem Youcef Belaili skoraði í gær. Dirk Kuyt skoraði eftir tæplega tólf mínútur af uppbótartíma gegn Arsenal í ensku úrvalsdeidinni árið 2011 og í Brasilíu skoraði Anderson, fyrrum miðjumaður Mancheter United, eftir tæplega 16 mínútur af uppbótartíma í leik Gremio og Nautico árið 2005.