Erlent

Mætti með gervihönd til að komast hjá bólusetningu

Samúel Karl Ólason skrifar
Ítalar taka upp bólusetningarpassa í næstu viku.
Ítalar taka upp bólusetningarpassa í næstu viku. EPA/GIUSEPPE LAMI

Ítalskur maður stendur frammi fyrir ákæru fyrir svik eftir að hann reyndi á frumlegan hátt að verða sér út um bólusetningarpassa án þess þó að láta bólusetja sig. Maðurinn mætti í bólusetningu með gervihönd fasta við sig.

Áður en hann settist niður fyrir sprautuna hafði maðurinn skrifað undir samþykkisblað hjá lækni.

Ráðabruggið tókst þó ekki hjá manninum. Samkvæmt ANSA fréttaveitunni var gervihöndin úr sílikoni og leit hann nokkuð raunverulega út.

Hjúkrunarfræðingurinn sem kom upp um svindlarann sagði La Repubblica þó að litur handleggsins hefði vakið grunsemdir hjá henni. Þegar hún kom höndina fann hún að ekki var allt með felldu.

Ekki liggur fyrir, miðað við fréttaflutning erlendis, hvort maðurinn var með heilan gervihandlegg eða jafnvel einhverskonar sílikonhlíf yfir upphandleggnum.

Eftir að upp komst um manninn reyndi hann þó að fá hjúkrunarfræðinginn til að líta hjá svindlinu og gefa sér passa. Hann sagðist þurfa passann til að vinna en vildi ekki láta bólusetja sig.

Hjúkrunarfræðingurinn segir marga vera reiða og þau þurfi oft að eiga í deilum við fólk. Það sói tíma þeirra og annarra.

Maðurinn sem er fimmtíu ára gamall var tilkynntur til lögreglu og stendur til að kæra hann.

Í frétt Guardian segir að frá því yfirvöld á Ítalíu tilkynntu að tekinn yrði upp bólusetningarpassi þar í landi þann 6. desember hafi töluverður fjöldi fólks mætt til að láta bólusetja sig í fyrsta sinn. Án bólusetningarpassa mun fólk ekki geta varið í kvikmyndahús, leikhús, líkamsrækt, knæpur og aðra staði.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.