Innlent

Allir leggist á eitt í baráttu við verðbólgu

Heimir Már Pétursson skrifar
Bjarni Benediktsson segir ríkissjóð verða rekinn með 169 milljarða halla á næsta ári og með nokkrum halla á næstu árum. Það væri ásættanlegt vegna aukins hagvaxtar á næstu árum sem yki tekjur ríkissjóðs.
Bjarni Benediktsson segir ríkissjóð verða rekinn með 169 milljarða halla á næsta ári og með nokkrum halla á næstu árum. Það væri ásættanlegt vegna aukins hagvaxtar á næstu árum sem yki tekjur ríkissjóðs. Vísir/Vilhelm

Fjármálaráðherra segir mikilvægt að aðilar vinnumarkaðarins leggist á eitt með Seðlabankanum og stjórnvöldum í að koma verðbólgunni niður. Hagur eldri borgara og öryrkja verði bættur á næsta ári og stefnt að nýjum samningum um þeirra kjör.

Bjarni Benediktsson fjármálaráðherra kynnti fjárlagafrumvarp næsta árs með 169 milljarða halla í morgun. Engu að síður gætir bjartsýni hjá ráðherranum enda bendi allt til þess að hagvöxtur aukist meira en áður var spáð og hraðar gangi að greiða niður skuldir ríkissjóðs.

Áætlanir um vöxt erlendra skulda ríkissjóðs sem hlutfall af landsframleiðslu hafa skánað frá því í vor vegna aukins hagvaxtar á þessu ári og næstu árum samkvæmt spám.fjármálaráðuneytið

Það væri ásættanlegt að reka ríkissjóð með halla í nokkur ár í viðbót. Að fimm árum liðnum verði skuldastaðan engu að síður heilbrigð og ríkissjóður þoli annað efnahagsáfall.

Fjármálaráðherra er bjartsýnn á efnahagshorfurnar og breiðir út faðminn til allra þeirra sem vilja sameinast í baráttunni gegn verðbólgunni.Vísir/Vilhelm

„Við höfum getu til að viðhalda opinberri þjónustu án þess að hækka skatta. Án þess að fara í niðurskurð. Heldur ætlum að halda úti gæða opinberri þjónustu á næstu árum á grundvelli þess styrks sem við höfum í ríkisfjármálunum,“ segir Bjarni.

Hér má sjá hvernig útgjöld ríkissjóðs á hvern íbúa dreifast á helstu málaflokka. Vaxtabyrði ríkissjóðs er ann nokkuð mikil.fjármálaráðuneytið

Áfram verði þörf á aðgerðum vegna faraldursins upp á 50 milljarða á næsta ári sem í heild verði þá komnar upp í 260 milljarða frá upphafi faraldurs. Atvinnuleysi hafi minnkað hratt og fjöldi nýrra starfa orðið til. Enn standi gistiþjónusta þó illa og því verði gistináttagjald ekki innheimt á næsta og þar næsta ári.

Gert er ráð fyrir að 50 milljarðar fari í stuðningsaðgerðir vegna kórónuveirufaraldurins á næsta ári. Að þeim meðtölum hefur ríkissjóður þá sett 260 milljarða í slíkar aðgerðir frá því faraldurinn hófst.fjármálaráðuneytið

„Við höfum getu til að koma með innspýtingu í heilbrigðismál. Við ætlum að standa með barnafjölskyldum. Það kemur viðbótarskattalækkun í gegnum persónuafsláttinn á næsta ári. Við stöndum með öryrkjum með sérstakri hækkun til þeirra,“ segir fjármálaráðherra.

Sömuleiðis verði frítekjumark ellilífeyrisþega vegna atvinnutekna tvöfaldað úr 100 í 200 þúsund krónur á mánuði. Þá vilji stjórnvöld taka upp viðræður við samtök eldri borgara og öryrkja um breytingar á greiðslum almannatrygginga.

Það tókst ekki að semja við öryrkja á síðasta kjörtímabili vegna ótta þeirra við hugmyndir um starfsgetumat. Bjarni segir ekki hægt að bjóða fólki upp á einhvers konar veðmál með starfsgetu sína.

„Heldur verði kerfið að vera hvetjandi. Það verði að vera endurkomuleið inn í réttindin ef starfsgetan er ekki til staðar eða hún breytist að nýju,“ segir Bjarni.

Almennt væru bjartir og spennandi tímar framundan með auknum framlögum í nýsköpun og grænar atvinnugreinar. Allir verði hins vegar að leggjast á árar með Seðlabankanum í að koma verðbólgu og vöxtum niður.

Samkvæmt fjárlagafrumvarpi hefur tekist að auka kaupmátt þrátt fyrir kórónuveirufaraldurinn.fjármálaráðuneytið

„Ég kalla já til aðila vinnumarkaðarins um að við tökum öll höndum saman um að gera það sem við getum til að halda aftur af verðbólgu og tryggja heimilum og fyrirtækjum í landinu hóflegt vaxtastig. Þannig að við getum haldið vextinum áfram,“ segir Bjarni Benediktsson.


Tengdar fréttir

Bjarni segir hvorki þörf á skattahækkunum né niðurskurði á næstu árum

Bjartsýni ríkir í fyrsta fjárlagafrumvarpi og fjármálaáætlun ríkisstjórnarinnar sem reiknar með meiri afkomubata ríkissjóðs en áður var áætlað. Það skili sér til fyrirtækja og heimila því hvorki þurfi að hækka skatta né skera niður til að halda upp góðri opinberri þjónustu. Barnabætur verið auknar og frítekjumark eftirlaunafólks tvöfaldað.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.