Innlent

Takmarkanir nauðsynlegar næstu mánuði eða ár

Snorri Másson skrifar
Þórólfur Guðnason og Bjarni Benediktsson fjármálaráðherra. Sóttvarnalæknir vill að stjórnvöld komi sér saman um milliveg í sóttvarnamálum til frambúðar, en telur síðra að ætla sér að slaka á og herða til skiptis. Reynslan sýni hvað tilslakanir hafi í för með sér - í því efni eigi menn að forðast að láta óskhyggju bera sig ofurliði.
Þórólfur Guðnason og Bjarni Benediktsson fjármálaráðherra. Sóttvarnalæknir vill að stjórnvöld komi sér saman um milliveg í sóttvarnamálum til frambúðar, en telur síðra að ætla sér að slaka á og herða til skiptis. Reynslan sýni hvað tilslakanir hafi í för með sér - í því efni eigi menn að forðast að láta óskhyggju bera sig ofurliði. Vísir/Vilhelm

Sóttvarnalæknir telur að samkomutakmarkanir þurfi að vera við lýði næstu mánuði eða ár. Hann vill hæfilegan milliveg til lengri tíma í stað þess að vera sífellt að herða og slaka á klónni.

Þórólfur Guðnason telur að með um það bil 80-90 smitum á dag taki það enn nokkur ár að ná fram náttúrulegu hjarðónæmi á Íslandi, nema ef betri vörn fæst með nýjum bóluefnum. Því þurfi stjórnmálamenn að ræða það alvarlega hvernig hátta skuli málum hér á komandi tímum.

„Ég held að á meðan við erum í þessum sporum og með þennan árangur í bólusetningum sem við erum með núna og faraldurinn í gangi erlendis, þá þurfum við að hafa einhverjar takmarkanir ef við ætlum ekki að yfirkeyra kerfið okkar hér innanlands,“ segir sóttvarnalæknir.

Sóttvarnalæknir skýrði málið í kvöldfréttum Stöðvar 2:

Mjög langt í náttúrulegt hjarðónæmi

Þar sem engin merki eru að sögn Þórólfs um að Covid sé á förum, er tillaga hans að feta milliveg í takmörkunum; ekki of mikið en ekki of lítið heldur, svo að bylgja geti tekið sig upp og yfirkeyrt sjúkrahúsin.

„Síðan geta menn náttúrulega farið í þann leik að herða og slaka en ég held að menn þurfi að ræða það alvarlega hvernig þeir vilja hafa þetta næstu mánuði eða jafnvel ár, þar til nægilegt ónæmi hefur skapast,“ segir Þórólfur.

Við náum sem sagt ekki tökum á veirunni fyrr en við náum ónæmi í samfélaginu og á þessari stundu erum við langt frá langþráðu hjarðónæmi. Hér innanlands hafa 13.739 greinst með veiruna, þ.e. 3,8% þjóðarinnar. 

Hjarðónæmi miðast við 60-70% og því verður ekki náð með þeim bóluefnum sem nú eru til, þar sem þau veita ekki nema 50% vörn fyrir smiti af veirunni. Náttúrulegt ónæmi eftir sýkingu er mun sterkara og til þess að ná því upp í hjarðónæmisviðmið þyrftum við tæp níu ár af stöðugum 70 smitum á dag. En í millitíðinni gæti auðvitað margt breyst.

En er að þínu mati ekki raunhæft að styrkja Landspítalann svo mikið að við getum bara í raun og veru látið allt flakka? „Nei, ég held að það muni einhvern tíma, að bæta spítalakerfið þannig að við getum bara látið veiruna ganga lausri hér um samfélagið og fá 2% af öllum smituðum hér inn á spítalann,“ segir Þórólfur.


Tengdar fréttir

Samanburður Svanhildar ósanngjarn og ekki góður

Þórólfur Guðnason segir fólk tjá sig um getu Landspítalans án þess að kynna sér málið nægilega vel. Það er ekki sanngjarnt að sögn sóttvarnalæknis að bera Covid-19 saman við svínaflensuna, eins og framkvæmdastjóri Viðskiptaráðs gerði í viðtali í gær.

Segir ráðherra vera að skjóta sendiboðann

Meðlimir stjórnarandstöðu segja að líta verði til stöðunnar á Landspítala þegar kemur að afléttingum samkomutakmarkana. Ljóst er að tilslakanir eru í kortunum en þingmenn eru ósammála um hvaða vægi tillögur sóttvarnalæknis eigi að hafa.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.