Erlent

Réttarhöldin gegn Rittenhouse hafin: Flestir höfðu þegar gert upp hug sinn

Samúel Karl Ólason skrifar
Kyle Rittenhouse í dómsal í dag.
Kyle Rittenhouse í dómsal í dag. AP/Sean Krajacic

Réttarhöldin gegn Kyle Rittenhouse hófust í gær. Hann var ákærður fyrir að skjóta tvo menn til bana á mótmælum í Kenosha í Bandaríkjunum í fyrra. Illa gekk að finna kviðdómendur til að meta sekt eða sakleysi Rittenhouse.

Flestir sem teknir voru til greina um að sitja í kviðdómi réttarhaldanna sögðust þegar hafa gert upp hug sinn varðandi Rittenhouse. Verkið tókst þó eftir langan dag og fundust tuttugu kviðdómendur. Þar af níu menn og ellefu konur, samkvæmt frétt Washington Post.

Þetta fólk var valið úr 150 manna hópi og tók valið á níu klukkustundir.

Saksóknarar og verjendur munu flytja upphafsræður sínar í dag en búist er við því að verjendur Rittenhouse muni segja hann hafa skotið tvo til bana og sært þann þriðja í sjálfsvörn. Þá er talið að réttarhöldin muni taka um tvær vikur.

Var í hópi vopnaðra manna

Umfangsmikil mótmæli vegna kerfisbundins rasisma í Bandaríkjunum, sem snerust upp í óeirðir, fóru fram í Kenosha síðasta sumar. Hófust þau eftir að lögregluþjónn skaut hinn þeldökka Jacob Blake ítrekað í bakið.

Rittenhouse, sem þá var sautján ára gamall, lagði leið sína til borgarinnar, úr öðru ríki og vopnaður hálfsjálfvirkum riffli, og gekk þar til liðs við hóp vopnaðra manna sem settu sér það markmið að verja fyrirtæki í borginni gegn mótmælendum og óeirðarseggjum. Á Facebook og Reddit höfðu hægri sinnaðir aðilar kallað eftir því að vopnaðir menn streymdu til Kenosha og tækju jafnvel lögin í sínar hendur.

Þegar kvöldinu lauk hafði Rittenhouse skotið tvo menn til bana og sært þann þriðja, sem var vopnaður skammbyssu.

Hann var ákærður fyrir tvö morð, morðtilraun og fyrir að vera flytja skotvopn milli ríkja, verandi undir lögaldri. Rittenhouse hefur neitað sök í öllum ákæruliðum en hann stendur frammi fyrir mögulegu lífstíðarfangelsi.

Eins og var bersýnilegt í vali kviðdómenda er Rittenhouse mjög svo umdeildur. Margir hafa hyllt hann sem hetju og aðrir segja hann morðingja. Burtséð frá allir pólitík og pólitískum deilum í Bandaríkjunum er líklegast að réttarhöldin muni snúast um það hvort kviðdómendur trúi því að um sjálfsvörn hafi verið að ræða eða ekki.

Hér má sjá ítarlega frétt New York Times þar sem rætt er við vitni, þann sem Rittenhouse særði og fógeta Kenosha. Einnig er farið yfir fjölda myndbanda af vettvangi.

Mega ekki kalla mennina sem hann skaut „fórnarlömb“

Áður en réttarhöldin hófust komst dómari málsins að þeirri niðurstöðu að saksóknarar mættu ekki kalla þá sem Rittenhouse skaut „fórnarlömb“. Dómarinn leyfir þó verjendum Rittenhouse að kalla mennina „óeirðaseggi“, „brennivarga“ eða „ræningja“.

„Orðið „fórnarlamb“ er gildishlaðið, gildishlaðið orð og ég held að „meint fórnarlamb“ sé frændi þess,“ sagði Bruce Schroeder, dómari, í úrskurði sínum í síðustu viku.

Kviðdómendur hræddir

Við val kviðdómenda í gær sagði Schroeder þeim að þau þyrftu að vera hlutlaus og taka eingöngu til greina það sem fram komi í réttarhöldunum við ákvarðanatöku þeirra að þeim loknum. Washington Post segir marga hafa sagt það ómögulegt.

Ein kona varð reið og sagði lífið snúast um ákvarðanir og afleiðingar. Beindi hún orðum sínum að Rittenhouse og spurði af hverju hann hefði ekki bara verið heima hjá sér.

Þá lýstu kviðdómendur yfir áhyggjum af öryggi þeirra vegna málsins. Nokkrir sögðu sama hver niðurstaða þeirra yrði, þá yrðu einhverjir reiðir út þau.


Tengdar fréttir

Vilja handtaka Rittenhouse aftur

Saksóknarar í Bandaríkjunum leitast nú eftir því að handtaka Kyle Rittenhouse á nýjan leik en hann hefur gengið laus gegn tryggingu eftir að hann var ákærður fyrir að hafa skotið tvo til bana á mótmælum í fyrra.

Lögreglumaðurinn sem skaut Jacob Blake ekki ákærður

Enginn lögreglumannanna sem voru viðriðnir mál Jacobs Blake verður ákærður. Blake, sem er svartur, var skotinn sjö sinnum í bakið af lögreglumanni í borginni Kenosha í Wisconsin-ríki í Bandaríkjunum í águst og er lamaður fyrir neðan mitti í kjölfar þess.

Segja Rittenhouse hetju og föðurlandsvin

Samkvæmt lögmönnum Kyle Rittenhouse var hann ekki hræddur táningur sem skaut tvo til bana í sjálfsvörn í Kenosha í Bandaríkjunum í síðasta mánuði. Hann var föðurlandsvinur. Hann var verjandi frelsis síns og réttinda sinna til að bera vopn inn um óeirðir á götum borgarinnar.

Útskýringar lögreglu í Kenosha þykja þunnur þrettándi

Eftir þriggja daga þögn lögregluyfirvalda og gríðarleg mótmæli í Kenosha í Wisconsin-ríki Bandaríkjanna hefur lögreglan loks gefið út sína hlið á því hvernig það atvikaðist að Jacob Blake var skotinn sjö sinnum í bakið af lögreglumanni.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.