Innlent

Segir um­fjöllun Kveiks jaðra við á­róður og varar fólk við að mæta í við­tal

Eiður Þór Árnason skrifar
Jón Ívar Einarsson gagnrýnir umfjöllun Kveiks sem birtist í fyrr í október.
Jón Ívar Einarsson gagnrýnir umfjöllun Kveiks sem birtist í fyrr í október. Samsett

Jón Ívar Einarsson, prófessor við læknadeild Harvard-háskóla, sakar fréttaskýringaþáttinn Kveik um að hafa sýnt hlutdrægni í umfjöllun um gagnrýnendur sóttvarnaraðgerða og finnst framsetning þáttarins til þess fallin að kasta rýrð á málflutning sinn.

Hann hvetur fólk til að hugsa sig vel um áður en það fellst á að koma í viðtal í þættinum. Ritstjóri Kveiks gefur lítið fyrir gagnrýnina og segir að faglega hafi verið unnið að umfjölluninni.

Rætt var við Jón Ívar í nýjasta þætti Kveiks sem birtist þann 5. október. Í innslaginu fjallaði fréttamaðurinn Arnhildur Hálfdánardóttir um fólk sem hefur haft uppi efasemdir um sóttvarnaraðgerðir stjórnvalda og bólusetningu gegn Covid-19.

Í aðsendri grein sem birtist á Vísi gagnrýnir Jón Ívar meðal annars hvernig hálftímalangt viðtal við hann hafi verið klippt niður í um 85 sekúndur.

„Það gefur augaleið að þetta gefur Kveik fullkomið frelsi til að klippa viðtalið eins og best passar þeirri sögu sem þau vilja segja. Eftir að hafa farið í þetta viðtal og svo horft á þáttinn er ljóst að Kveikur var búinn að skrifa handritið að mestu fyrirfram og svo voru viðtöl viðmælenda klippt til eins og hentaði handritinu. Síðan voru fengnir álitsgjafar með réttar skoðanir og þeir klipptir inn í til að leiðrétta hina viðmælendurna,“ segir Jón Ívar.

Innslagið unnið af heiðarleika

Þóra Arnórsdóttir, ritstjóri Kveiks, segir eðlilegt að fólk sem taki þátt í samfélagsumræðu kalli eftir því að þeirra sjónarmið fái meiri rými í umræðunni. Hún hafnar því að ummæli Jóns Ívars hafi verið tekin úr samhengi og segir Arnhildi hafa sýnt sanngirni við vinnslu innslagsins.

„Hún stóð fyllilega undir þeirri ábyrgð að koma til skila sjónarmiðum margra innan þessa fjölbreytta hóps sem hún var að fjalla um. Ég hef ekkert við hennar vinnubrögð að athuga og hún kom fram af fullkomnum heiðarleika og þátturinn eiginlega talar fyrir sig.“

Þóra bætir við að Arnhildur hafi sótt margskonar efni og handritið verið unnið upp úr því efni sem hún fékk.

Um ellefu prósent landsmanna sem hafa náð tólf ára aldri hafa ekki þegið bólusetningu gegn Covid-19.Vísir/Vilhelm

Jón Ívar segir að eðlilegra hafi verið að taka stutt og hnitmiðað viðtal um hans afstöðu.

„Það hentaði samt ekki Kveik, því þau virtust hafa lítinn áhuga á að heyra mína hlið, heldur frekar að finna augnablik sem létu mína afstöðu líta illa út.“

Þá sakar hann Arnhildi um að hafa ítrekað reynt að koma sér úr jafnvægi í viðtalinu, meðal annars með því að spyrja hvers vegna hann hafi líkað við ummæli manns á Facebook sem vændi íslensk stjórnvöld um lygaáróður.

Jón Ívar sagði þá að honum finnist stjórnvöld hafa misst trúverðugleika þar sem fólk tapi trausti þegar það segi ósatt. Hann sagðist þó ekki vilja ganga svo langt að saka stjórnvöld um lygaáróður.

Umfjöllunin jaðri við áróður

Í grein sinni gerir Jón Ívar jafnframt athugasemd við að hafa verið kynntur sem kvensjúkdómalæknir þar sem hann sé sömuleiðis með meistaragráðu í lýðheilsufræðum og skoðað sóttvarnamál mál út frá því.

Hann bætir við að svo virðist sem Kveikur hafi ekki stundað rannsóknarblaðamennsku í þessu máli heldur „frekar misvísandi fréttaskýringar sem jaðri við áróður.“

Í Kveik var meðal annars rætt við fólk sem hefur mótmælt sóttvarnaaðgerðum og bólusetningum á Austurvelli.vísir

Jón Ívar ráðleggur fólki sem fær boð um að koma í viðtal hjá Kveik að hugsa sig vel um.

„Það er mögulegt að búið sé að skrifa handritið og það er mikilvægt að vita hvort þú sért í „góða“ liðinu eða „vonda“ liðinu. Ef þú ert í „vonda“ liðinu er sennilega ekki þess virði að taka þátt því Kveikur mun einungis birta þau brot úr viðtalinu sem hentar þeirra málflutningi og sennilega fá viðmælendur úr „góða“ liðinu til að „leiðrétta“ þín orð.“

Vill að viðtalið verði birt í heild sinni

Jón Ívar skorar á Þóru að birta viðtalið við sinni í heild sinni inn á vef RÚV svo fólk geti borið það saman við hvernig það birtist í þættinum.

Þóra segir viðmælendur sem komi í viðtal hjá fjölmiðlum geti ekki krafist þess að þau séu birt í heild sinni. Þar með sagt sé ekki búið að útiloka að Kveikur verði við kröfu Jóns Ívars. Það standi til að gefa út lengri útgáfur af vissum viðtölum á hlaðvarpsformi samhliða frumsýningu þátta í vetur en þó séu viðtöl almennt ekki birt í heild sinni á vefnum.

„Við byggjum okkar starf á því að fólk treysti okkur fyrir vinnslunni á því sem fólk hefur fram að færa og það hefur bara gengið vel hingað til. Það er auðvitað leitt að heyra að honum finnist þetta en ég veit að það var unnið úr þessu viðtali inn í stóra umfjöllun þar sem margir koma fram að fullkomnum heiðarleika. Það var ekkert klippt úr samhengi eða dregnar einhverjar óeðlilegar ályktanir, bara fjarri því,“ segir Þóra Arnórsdóttir, ritstjóri Kveiks.


Tengdar fréttir

Stundar Kveikur rann­sóknar­blaða­mennsku?

Því miður markast fréttaflutningur í dag m.a. af því hver heldur um pyngjuna hjá viðkomandi fjölmiðli. Kveikur er hins vegar framleiddur af Ríkissjónvarpinu og því bjóst ég við hlutleysi og vinnubrögðum í anda Bob Woodward. Sú var þó ekki raunin.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.