Enska landsliðið í fótbolta átti ekki í neinum vandræðum með Andorra þegar liðin mættust í undankeppni HM í Katar í smáríkinu í kvöld.
Gareth Southgate hóf leik með Harry Kane og Raheem Sterling á varamannabekknum en enska liðið átti ekki í miklum erfiðleikum með að brjóta þétta vörn heimamanna á bak aftur.
Ben Chilwell opnaði markareikninginn á 17.mínútu og Bukayo Saka tvöfaldaði forystuna skömmu fyrir leikhlé.
Í síðari hálfleik voru Tammy Abraham, James Ward Prowse og varamaðurinn Jack Grealish á skotskónum en Ward Prowse fylgdi á eftir vítaspyrnu sem hann sjálfur klúðraði.
Lokatölur 0-5 fyrir Englendingum sem eru taplausir á toppi I-riðils eftir sjö leiki.
