Innlent

Ýmis kerfi komin að þolmörkum

Hólmfríður Gísladóttir skrifar
Kamilla Sigríður Jósefsdóttir, staðgengill sóttvarnalæknis, sagði örvunarbólusetningar „á fullu“.
Kamilla Sigríður Jósefsdóttir, staðgengill sóttvarnalæknis, sagði örvunarbólusetningar „á fullu“. Skjáskot

Víðir Reynisson yfirlögregluþjónn almannavarnadeildar Ríkislögreglustjóra segir stöðu kórónuveirufaraldursins hafa þyngst og að ýmis kerfi séu komin að þolmörkum. 

Hann segir hlutfall alvarlega veika minna en áður en það sé takmörkuðu huggun þegar um sé að ræða heilsu fólks.

Þetta kom fram á upplýsingafundi rétt í þessu.

Kamilla Sigríður Jósefsdóttir, staðgengill sóttvarnalæknis, segir örvunarbólusetningar kennara og skólastarfsmanna „á fullu“ og verið sé að undirbúa bólusetningar barna á aldrinum 12 til 15 ára. 

Meðal annars sé unnið að því að finna hentugt húsnæði fyrir þær bólusetningar en þær hefjist af fullum krafti þegar örvunarbólusetningum Janssen-þega sé lokið.

Að sögn Kamillu er mikilvægt að þeir sem séu núna að greinast með Covid-19 eða greindust fyrr í sumar fari ekki í örvunarbólusetningu fyrr en þremur mánuðum eftir veikindin.

Þá segir hún að þeir sem hafi fengið Covid-19 eftir að hafa verið bólusettir fái ekki örvunarskammt á næstunni, þar sem smit sé jafngildi örvunarskammts.

Segir hún embættið hafa fengið kvartanir vegna skorts á upplýsingum fyrir þá sem hafa bæði fengið Covid-19 og bólusetningu og að til standi að kippa því í liðinn um leið og færi gefst.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.