Fótbolti

Svekkjandi tap í fyrsta leik Guðlaugs Victors

Valur Páll Eiríksson skrifar
Guðlaugur Victor og hans menn byrja ekki vel í nýrri deild.
Guðlaugur Victor og hans menn byrja ekki vel í nýrri deild. Joris Verwijst/BSR Agency/Getty Images

Íslenski landsliðsmaðurinn Guðlaugur Victor Pálsson spilaði sinn fyrsta deildarleik fyrir Schalke 04 er liðið tapaði 3-1 Hamburger SV í fyrstu umferð þýsku B-deildarinnar í fótbolta í Gelsenkirchen í kvöld. Varamenn Hamburgar reyndust þeirra liði vel á lokakaflanum.

Guðlaugur Victor skipti til Schalke í sumar frá Darmstadt og byrjaði leikinn sem djúpur miðjumaður hjá liði Schalke sem féll úr úrvalsdeildinni síðasta vor. Andstæðingurinn var Hamburgar SV, en um er að ræða tvö sögufræg þýsk félög sem bæði stefna ótrauð upp í efstu deild að ári.

Schalke byrjaði betur í Gelsenkirchen í kvöld þar sem framherjinn Simon Terodde kom liðinu í forystu með laglegri afgreiðslu eftir að hafa sloppið í gegn eftir skyndisókn á 7. mínútu. Markið var upprunalega dæmt af vegna rangstöðu en því var snúið við eftir endurskoðun myndbandsdómara.

Robert Glatzel, framherji HSV, sem kom frá velska liðinu Cardiff City í sumar, fékk tækifæri til að skora í sínum fyrsta leik fyrir félagið þegar liðið fékk vítaspyrnu á 28. mínútu. Hann lét hins vegar Michael Langer, markvörð Schalke, verja frá sér.

1-0 stóð í hléi en Glatzel gerði hins vegar upp fyrir mistökin snemma í síðari hálfleik þegar hann jafnaði metin er hann fylgdi eftir aukaspyrnu liðsfélaga síns sem Langer varði fyrir fætur hans.

Allt virtist stefna í jafntefli en á 86. mínútu skoraði varamaðurinn Moritz Heyer annað mark HSV þar sem dekkning Schalke í teignum klikkaði og hann lagði boltann laglega af stuttu færi í netið.

Schalke komst í tvígang nærri því að jafna í kjölfarið en Daniel Heuer Fernandes markmaður HSV varði vel. Hamburg fór eftir það í skyndisókn og Gambíumaðurinn Bakery Jatta, annar varamaður, skoraði frá markteig eftir fyrirgjöf frá vinstri til að innsigla 3-1 sigur Hamborgara.

Guðlaugur Victor spilaði allan leikinn á miðju Schalke í kvöld.




Fleiri fréttir

Sjá meira


×