Erlent

Drakk óhóflega, neytti kókaíns og stakk blysi í rassinn á sér en sér ekki eftir neinu

Samúel Karl Ólason skrifar
Drykkjulæti enskra fótboltabullna eru ekki talin auka möguleika Breta á því að þeir fái að halda Heimsmeistararmótið 2030.
Drykkjulæti enskra fótboltabullna eru ekki talin auka möguleika Breta á því að þeir fái að halda Heimsmeistararmótið 2030. AP/Zac Goodwin

Gífurleg drykkja fór fram í London síðasta sunnudag þegar úrslitaleikur Evrópumótsins í fótbolta fór þar fram. Myndir og myndbönd af drykkjulátum og skemmdarverkum breskra fótboltabullna hafa vakið mikla athygli og fara sem eldur í sinu um internetið. Einn maður vakti sérstaka athygli þegar myndir af honum með neyðarblys í rassi fóru í dreifingu.

Sá maður heitir Charlie Perry og er tuttugu og fimm ára gamall. Hann varði deginum í að drekka óhóflega, neyta fíkniefna. Þá stakk Perry blysinu í rassinn á sér með tilþrifum og við mikinn fögnuð félaga sinna. Að auki mútaði hann öryggisverði til að komast á Wembley-leikvanginn, þó hann ætti ekki miða á leikinn.

Perry sér ekki eftir neinu.

Í samtali við The Sun segist Perry hafa drukkið um tuttugu sítrusbjóra og neitt „haugs“ af kókaíni.

„Þetta var stærsti dagur lífs míns. Það voru engar reglur þennan dag. Það eina sem ég veit er að ég dýrkaði þetta allt saman. Ég var á skallanum og naut hverrar mínútu,“ hefur Sun eftir Perry.

Sun segir Perry hafa verið við drykkju allan daginn og hefur eftir honum að hann stundi það með reglubundnum hætti að lauma sér inn á fótboltaleiki án þess að borga miða og það hafi honum tekist á sunnudaginn.

Hann segist hafa mútað öryggisverði til að hleypa sér og svo öðrum í gegnum sérstakt hlið á leikvanginum. Allt í allt hafi múturnar kostað hann um 250 pund.

Hér má sjá mynd af Perry með blysið í rassinum. Það sést ekki vel á myndinni en ef að er gáð má sjá að hann er með húðflúr á rassinum, texta sem segir: „Benidorm Bunters“ sem mun vera tilvísun í steggjunarferð sem hann fór í til Benidorm.

Perry segist hafa brennt sig á blysinu en hann hafi hins vegar lítið fundið fyrir því vegna ölvunar. Þá tók hann það fram sérstaklega að enginn hafði manað sig til að stilla sér upp með blysið á þennan frumlega hátt - hann hafi alveg átt þá hugmynd alveg einn og sjálfur.

Telja mögulegt að leiknum hefði getað verið frestað

Alls var 51 fótboltabullur handteknar á sunnudaginn og þar af 26 á Wembley. Minnst nítján lögregluþjónar særðust í átökum við bullur sem ruddust inn á leikvanginn. Margir sem höfðu keypt sér miða á leikinn komu að draugfullum fótboltabullum í sætum sínum sem svo harðneituðu að víkja.

Jane Connors, einn yfirmanna lögreglunnar í London sem stýrði viðbúnaðinum í tengslum við leikinn, segir að lögreglunni hafi ekki mistekist á sunnudaginn. Án hennar og aðgerða vegna látanna hefði leiknum hæglega getað verið frestað.

Eins og áður sagði eru þessi yfirgengilegu læti í breskum aðdáendum og hegðun þeirra öll talin koma niður á möguleikum Breta á að fá að halda heimsmeistaramótið í knattspyrnu árið 2030.


Tengdar fréttir

„Hatrið mun aldrei sigra“

Jadon Sancho segir að kynþáttafordómarnir sem hann varð fyrir eftir úrslitaleik EM hafi ekki komið sér á óvart. Hann segir þó að hatrið muni aldrei sigra.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.