Sænskt par dæmt fyrir 181 nauðgun gegn barni

Hallgerður Kolbrún E. Jónsdóttir skrifar 9. júlí 2021 11:00

Parið er sagt hafa framleitt meira en 100 klukkutíma af barnaníðsefni. Getty

Sænskt par var í morgun sakfellt fyrir að hafa ítrekað nauðgað og misnotað tvö börn og að hafa átt og framleitt gríðarlegt magn af barnaklámi. Konan var dæmd í átta og hálfs árs fangelsi en maðurinn var dæmdur í 13 ára og sex mánaða fangelsi.

Linda Caneus, saksóknari, segir málið eitt stærsta sinnar tegundar sem komið hafi upp í Svíþjóð. Fólkið var handtekið síðasta vor eftir að læknir tók eftir áverkum á barni sem benti til að það hafi verið misnotað. Karlmaðurinn, sem er á fimmtugsaldri, var handtekinn í kjölfarið og húsleit gerð á heimili hans í Kalmar sýslu í Svíþjóð. Sænska ríkisútvarpið greinir frá.

Þar fannst gríðarlegt magn barnakláms, meðal annars efni sem hann hafði framleitt sjálfur, og í kjölfarið var konan, sem er á fertugsaldri, handtekin í tengslum við málið. Á þeim tíma starfaði konan á leikskóla, en ekki er talið að hún hafi nýtt sér stöðu sína þar til barnaníðs. Talið er að parið hafi misnotað tvö börn ítrekað og nam ákæran 400 liðum.

Framleiddu 100 klukkustundir af barnaníðsefni

Parið þarf að greiða börnunum tveimur eina milljón sænskra króna í miskabætur, sem nemur rúmum 14 milljónum íslenskra króna.

Óyggjandi sönnunargögn lágu fyrir í málinu en parið hafði verið duglegt við að taka upp ofbeldið sem þau beittu börnin. Alls fundust 1,8 milljón skrár á tölvum þeirra sem innihéldu barnaklám, þar af voru 200.000 skrár sagðar innihalda mjög gróft ofbeldi.

Frá því að rannsókn hófst hefur lögreglan skoðað meira en 700 þúsund af þessum skrám, sem voru meira en þúsund klukkustundir af barnaklámi. Talið er að parið hafi framleitt um 100 klukkustundir af efninu. Talið er að ofbeldið hafi varað í sex ár.

Maðurinn var sakfelldur fyrir 181 grófa nauðgun gegn barni og fyrir stórfellda framleiðslu á barnaníðsefni. Konan var sakfelld fyrir 14 grófar nauðganir gegn barni og fyrir að hafa framleitt barnaníðsefni.

Svíþjóð Ofbeldi gegn börnum

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.