Fótbolti

Messi, Ramos og stjörnurnar sem verða samningslausar í sumar

Ingvi Þór Sæmundsson skrifar
Lionel Messi, Gianluigi Donnarumma, Sergio Agüero og Sergio Ramos gætu allir verið frítt frá sínum félögum í sumar.
Lionel Messi, Gianluigi Donnarumma, Sergio Agüero og Sergio Ramos gætu allir verið frítt frá sínum félögum í sumar. vísir/getty

Óvenju margar stórstjörnur verða samningslausar í sumar. Þeirra á meðal eru fyrirliðar Barcelona og Real Madrid, Lionel Messi og Sergio Ramos.

Daily Mail tók saman lista yfir tíu feitustu bitana sem verða með lausan samning í sumar og geta því farið frítt frá sínum liðum.

Messi er að sjálfsögðu á toppi listans. Argentínumaðurinn óskaði eftir því að fara frá Barcelona síðasta sumar og hefur ekki enn skrifað undir nýjan samning við félagið. Barcelona á í miklum fjárhagskröggum en Joan Laporta, nýr forseti félagsins, gæti þó sannfært Messi um að halda kyrru fyrir.

Messi hefur aðallega verið orðaður við Paris Saint-Germain og Manchester City þar sem hann myndi hitta fyrir sinn gamla knattspyrnustjóra hjá Barcelona, Pep Guardiola.

Einn besti vinur Messis, Sergio Agüero, verður einnig samningslaus í sumar en nýverið greindi City frá því að hann yrði ekki áfram hjá félaginu. Hann hefur meðal annars verið orðaður við Barcelona og Chelsea.

Ramos hefur ekki enn skrifað undir nýjan samning við Real Madrid, félagið sem hann hefur leikið með síðan 2005. Ramos vill fá tveggja ára samning en Real Madrid er bara tilbúið að bjóða honum eins árs samning. Hann hefur aðallega verið orðaður við PSG.

Hollensku landsliðsmennirnir Memphis Depay og Georginio Wijnaldum verða lausir allra mála hjá Lyon og Liverpool í sumar. Barcelona hefur augastað á þeim báðum.

Edinson Cavani, sem hefur leikið frábærlega með Manchester United á undanförnum vikum, verður samningslaus í sumar en United vill fyrir alla muni halda Úrúgvæanum.

Þá getur markvörður AC Milan, Gianluigi Donnarumma, farið frítt frá félaginu í sumar. Juventus rennir hýru auga til ítalska landsliðsmarkvarðarins.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.