Már Gunnars­son setti heims­met

Már Gunnarsson syndir fyrir ÍRB í Reykjanesbæ og keppir í flokki S11 (blindir) og hefur vakið mikla athygli undanfarin misseri fyrir frábæran árangur. Hann gerði sér lítið fyrir og setti heimsmet í dag á ÍM50 í Laugardalnum eins og mótið er kallað.

Gamla metið var sett í Barcelona árið 1992. Það var 2:33,42 mínútur en Már synti á 2:32,31 mínútu og bætti það þar með um rúmlega sekúndu. Már hafði bætt Íslandsmetið fyrr í dag þegar hann synti á 2:33,76 en hann toppaði það heldur betur í kvöld.