Erlent

Klúður í verksmiðju tefur bóluefni Johnson & Johnson

Kjartan Kjartansson skrifar
Hylki með bóluefni Johnson & Johnson. Aðeins þarf að gefa einn skammt af bóluefninu.
Hylki með bóluefni Johnson & Johnson. Aðeins þarf að gefa einn skammt af bóluefninu. AP/Mary Altaffer

Um fimmtán milljónir skammta af bóluefni Johnson & Johnson gegn kórónuveirunni eru sagðir hafa eyðilagst þegar starfsmenn í verksmiðju í Baltimore rugluðu saman innihaldsefnum fyrir nokkrum vikum. Klúðrið er sagt tefja afhendingu á bóluefninu.

Framleiðsla verksmiðju fyrirtækisins Emergent BioSolutions verður ekki afhent kaupendum í Bandaríkjunum fyrr en lyfjaeftirlitsstofnun Bandaríkjanna hefur lokið úttekt sinni á mistökunum, að sögn New York Times.

Þau hafa ekki áhrif á skammta sem hefur þegar verið dreift og notaðir vestanhafs. Þeir skammtar voru framleiddir í Hollandi. Senda átti tugi milljóna skammta frá verksmiðjunni í Baltimore út á næstu vikum en útlit er fyrir að það tefjist á meðan gæðaeftirlit stendur yfir.

AP-fréttastofan segir að Johnson & Johnson hafi lofað að afhenda bandarísku alríkisstjórninni tuttugu milljónir skammta af bóluefninu fyrir lok þessa mánaðar og áttatíu milljónir til viðbótar fyrir lok maí. Fyrirtækið segir nú að það stefni enn að því að ná markmiðinu og afhenda hundrað milljónir skammta fyrir lok júní.

Fyrir lok þessa árs stefnir Johnson & Johnson á að dreifa meira en milljarði skammta af bóluefninu á heimsvísu.

Bólusetningar Bandaríkin Faraldur kórónuveiru (COVID-19)
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið