Erlent

Ó­víst hvort út­flutnings­tak­markanir hafi á­hrif á Ís­land

Kjartan Kjartansson skrifar
Ekki er búið að samþykkja hertu útflutningsreglurnar í Evrópu en utanríkisráðuneytið vinnur að því að afla upplýsinga um þær og möguleg áhrif á Ísland.
Ekki er búið að samþykkja hertu útflutningsreglurnar í Evrópu en utanríkisráðuneytið vinnur að því að afla upplýsinga um þær og möguleg áhrif á Ísland. Vísir/Vilhelm

Utanríkisráðuneytið segist ekki hafa fengið neinar upplýsingar sem gefi tilefni til að ætla að fyrirhugaðar útflutningstakmarkanir Evrópusambandsins á bóluefni gegn kórónuveirunni hafi áhrif á afhendingu bóluefnis hingað.

Búist er við að framkvæmdastjórn Evrópusambandsins samþykkti tillögur um hertar útflutningstakmarkanir á bóluefni gegn kórónuveirunni í dag. Aðgerðunum er sagt ætlað að tryggja að útflutningur á bóluefni sem er framleitt í aðildarríkjunum tefji ekki enn afhendingu á því innan álfunnar.

Með reglunum fengju ríki heimild til þess að stöðva útflutning til landa þar sem bólusetning gegn veirunni er lengra á veg komin eða landa sem leyfa ekki útflutning á bóluefni sem er framleitt þar. Þær eru sagðar beinast sérstaklega að Bretlandi og Bandaríkjunum.

Sveinn Guðmarsson, upplýsingafulltrúi utanríkisráðuneytisins, segir að það reyni nú að afla sér upplýsinga um fyrirhugaðar reglur ESB. Það hafi þó ekki fengið neinar upplýsingar sem gefi tilefni til að ætla að reglurnar hefðu áhrif á afhendingu bóluefna til Íslands.

Evrópusambandið hefur átt í deilum við bresk stjórnvöld vegna bóluefnis AstraZeneca. Það sakar bresk-sænska lyfjafyrirtækið um að standa ekki við gerða samninga um afhendingu bóluefnis og er ósátt við að það fái ekkert af því bóluefni sem sé framleitt í Bretlandi. Á sama tíma hafi Bretland fengið um ellefu milljónir skammta af þeim 45 milljónum sem hafa verið fluttir út frá aðildarríkjum þess.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.