Lífið

Óvæntur afmælisgjörningur Bjarna fyrir Þóru Margréti á N1

Kolbeinn Tumi Daðason skrifar
Bjarni Benediktsson og Þóra Margrét Baldvinsdóttir.
Bjarni Benediktsson og Þóra Margrét Baldvinsdóttir.

Viðskiptavinir N1 í Ártúnshöfða ráku margir hverjir upp stór augu í gær þegar þeir voru mættir í óvæntan afmælisgjörning sem Bjarni Benediktsson, fjármála- og efnahagsráðherra, hafði skipulagt fyrir Þóru Margréti Baldvinsdóttur konu sína.

Vitni að gjörningnum upp úr klukkan tólf að hádegi á laugardag lýsir því í samtali við fréttastofu þegar hjónin úr Garðabænum mættu á bensínstöðina. Þóra Margrét brá sér á snyrtinguna og þá hafði Bjarni eiginmaður hennar hraðar hendur.

Fjórir vinir þeirra hjóna biðu með Bjarna, vopnuð blómum og blöðrum, þegar Þóra Margrét kom af snyrtingunni. Gjörningurinn virtist koma henni í opna skjöldu en Þóra Margrét fagnar fimmtugsafmæli sínu þann 1. mars.

Blöðrurnar voru tvær, önnur merkt 5 og hin núll, til merkis um tímamótaaldur Þóru Margrétar. Hópurinn hló að uppákomunni áður en allir héldu út í bíl. Má telja líklegt að hópurinn hafi því næst haldið út úr bænum miðað við stemmninguna í hópnum en bensínstöðin er vinsælt stopp á leiðinni úr bænum.

Bjarni Benediktsson, sem varð fimmtugur í janúar í fyrra, var gestur Einkalífsins á Vísi í vikunni og ræddi þar meðal annars samband þeirra Þóru Margrétar.






Fleiri fréttir

Sjá meira


×