The Guardian segir yfir 6.500 verkamenn hafa látist í Katar frá því að landið fékk HM

Íslenska landsliðið sem og öll önnur lið Evrópu hefja eftir mánuð leik í undankeppni HM sem öll fer fram á þessu ári. Ísland leikur í riðli með Þýskalandi, Rúmeníu, Norður-Makedóníu, Armeníu og Liechtenstein, og fær efsta liðið farseðilinn til Katar. Næstefsta liðið fer í umspil um að komast á stærsta svið fótboltans, lokakeppni HM þar sem 32 bestu landslið heims spila.

Valið á Katar sem gestgjafa hefur verið lengi umdeilt, bæði vegna gruns um spillingu og mútur við valið, og vegna þess að ekki er hægt að halda HM um sumar í Katar. Því fer mótið fram 21. nóvember til 18. desember á næsta ári.

Samkvæmt úttekt breska blaðsins The Guardian hafa svo þúsundir verkamanna látið lífið við gerð mannvirkja svo hægt sé að halda HM. Um er að ræða fólk frá Indlandi, Pakistan, Nepal, Banglades og Sri Lanka. The Guardian bendir á að stórir hópar verkamanna hafi komið til Katar frá öðrum löndum, til að mynda Filippseyjum og Kenía, en ekki hafist upplýsingar um fjölda látinna frá þeim löndum.

Segir mjög marga hinna látnu aðeins í landinu vegna HM

Katar hafði betur gegn Bandaríkjunum árið 2011 í baráttunni um að halda HM. The Guardian hefur eftir Nick McGeehan, formanni FairSquare verkefnisins sem berst fyrir réttindum verkafólks við Persaflóa, að á þeim tæpa áratug sem liðinn sé síðan þá sé líklegt að margir hinna 6.500 látnu hafi unnið við verkefni tengd HM.

„Mjög stór hluti þeirra verkamanna sem hafa dáið síðan 2011 voru aðeins í landinu vegna þess að Katar fékk réttinn til að halda heimsmeistaramótið,“ sagði McGeehan.

The Guardian hefur safnað upplýsingum sínum frá heimalöndum hinna látnu. Mótshaldarar í Katar segja að 37 manns, sem unnið hafi við gerð knattspyrnuleikvanga vegna HM, hafi látist en þar af séu 34 andlát sem „tengist ekki vinnunni“. Sérfræðingar hafa sett spurningamerki við þessa fullyrðingu um að andlát tengist ekki vinnu, þar sem hún hafi meðal annars verið notuð um menn sem hafi hnigið niður og látist á vinnusvæði.

Í opinberum skýrslum í Katar er dánarorsök verkafólksins í langflestum tilvikum sögð af náttúrulegum orsökum. Mannréttindasamtök hafa kallað eftir nánari útskýringum á því hvers vegna svo margt verkafólk hafi látist og vilja að lögum verði breytt svo krufning sé leyfð vegna allra óvæntra eða óútskýrðra dauðsfalla.

Stjórnvöld í Katar segja að í ljósi þess hve margt verkafólk sé í landinu sé dánartíðnin eðlileg, þó að hvert andlát sé sorgaratburður. Allt sé reynt til að koma í veg fyrir að fólk látist. Öllum standi frí heilbrigðisþjónusta til boða og að dánartíðni verkafólks hafi lækkað á síðustu árum.

Í yfirlýsingu frá FIFA segir að slys við gerð knattspyrnuleikvanga fyrir HM séu fá miðað við aðrar stórar byggingaframkvæmdir í heiminum, án þess þó að þeirri fullyrðingu fylgdu gögn því til sönnunar.