Innlent

„Erfitt fyrir fólk að koma aftur í vinnuna eftir langa fjarveru“

Lillý Valgerður Pétursdóttir skrifar
Sigrún Arnardóttir sálfræðingur segir það reynast mörgum erfitt að mæta aftur á vinnustaði sína eftir að hafa unnið að heiman í marga mánuði.
Sigrún Arnardóttir sálfræðingur segir það reynast mörgum erfitt að mæta aftur á vinnustaði sína eftir að hafa unnið að heiman í marga mánuði. Vísir/Einar

Sóttvarnalæknir telur aðgerðir á landamærum hafa skipt sköpum í baráttunni við kórónuveiruna. Hann er bjartsýnn á að það takist að slaka á sóttvarnaraðgerðum fyrr en til stóð en segir þó mikilvægt að flýta sér hægt. Sálfræðingur segir erfitt fyrir marga að mæta aftur til vinnu eftir langa fjarveru nú þegar vinnustaðir eru farnir að bjóða fleirum að mæta aftur á skrifstofurnar.

Enginn greindist með kórónuveiruna innanlands í dag en þeim hefur fækkað jafnt og þétt undanfarið sem greinst hafa með veiruna. „Þetta er búið náttúrulega að ganga ótrúlega vel með jól og áramót þegar við sjáum að aðrar þjóðir eru að fá mikið bakslag í sína faraldra í kringum þessar hátíðir en við höfum ekki gert það,“ segir Þórólfur Guðnason sóttvarnalæknir.

Sú reglugerð um sóttvarnaraðgerðir sem nú er í gildi gildir til 17. febrúar. Þórólfur er bjartsýnn á að ef fáir greinast áfram verði hægt að létta fyrr á aðgerðunum. „Ef þetta heldur svona áfram þá getum við virkilega farið að hugsa um hvort við eigum að fara að slaka meira á. En ég minni á að það er varla nema rúm vika liðin síðan síðustu afléttingar tóku gildi. Við þurfum að flýta okkur hægt.“ 

Á meðan þeim fækkar sem greinast með veiruna innanlands hafa eitt hundrað þrjátíu og sex greinst með virkt smit á landamærum frá áramótum. Þórólfur segir eftirlit á landamærunum hafa skipt sköpum í baráttunni við veiruna.

„Menn eru að grípa til núna aðgerða á landamærum, þessi lönd, sem að við erum búin að vera að nota núna alveg frá því síðastliðið sumar og ég fullyrði það að það hafi að mörgum leyti skipt sköpum fyrir okkur að við höfum náð tökum á þessu. Plús náttúrulega aðgerðir sem að hafa verið innanlands. Ég held að menn séu að sjá það núna annars staðar hversu mikilvægt er að halda landamærunum hreinum. Ég held að það sé bara í mörgum löndum full seint í rassinn gripið með það.“

Getur reynst erfitt að mæta aftur á vinnustaðinn

Reglugerðin um núgildandi sóttvarnaraðgerðir tók gildi í síðustu viku. Hún hefur það meðal annars haft það í för með sér að tuttugu manns mega koma saman í stað tíu. Þetta hefur haft áhrif á marga vinnustaði þar sem starfsfólk er í auknu mæli farið að mæta aftur til vinnu. Sálfræðingar hafa fundið fyrir því að sumir sem hafa lengi unnið að heima kvíða því að mæta aftur á vinnustaðinn.

„Ég held að fólk sé búið að koma sér svolítið þægilega fyrir heima og það er alltaf smá fyrirhöfn að fara úr þessum þægindaramma aftur af stað og rútína hjá mörgum búin að raskast mikið sem hefur svo góð áhrif á okkar andlegu líðan. Svona minni virkni og einnig kannski svolítið frammistöðukvíði líka. Það er erfitt fyrir fólk að koma aftur í vinnuna eftir langa fjarveru og það fer jafnvel að hafa efasemdir um sjálft sig. Bý ég yfir sömu getu og áður og hvað með samskipti við vinnufélaga og fleira,“ segir Sigrún Arnardóttir sálfræðingur hjá Mín líðan. 


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.