Talaði bara um það sem ríkisstjórnin ætlaði ekki að gera

„Við eigum að þora að þróa nýja stjórnarhætti sem styðja við lýðræðislega ábyrgð og gera okkur kleift að takast á um ólíkar skoðanir á friðsamlegan hátt," sagði Árni Páll Árnason, formaður Samfylkingarinnar, á Alþingi í kvöld.

Í ræðu sinni sagði hann að ríkisstjórn Samfylkingar og Vinstri grænna hafi breytt um verklag á síðasta kjörtímabili og nú beri nýrri ríkisstjórn að deila fyrirsvari í nefndum með stjórnarandstöðu.

„En það er þörf á að breyta fleiru. Eitt blasir við: Að koma í veg fyrir slys eins og það sem varð hér fyrir helgi við skipan í karlanefndir og kvennanefndir. Það má ekki endurtaka sig. Annað: Við þurfum að tryggja að stjórnarandstaða fái allar trúnaðarupplýsingar um efnahagsmál. Síðast þegar þessir tveir flokkar voru í ríkisstjórn héldu þeir því leyndu að bankakerfið riðaði til falls og komu þannig í veg fyrir að unnt væri að grípa tímanlega inn í það hættuástand sem þá var í uppsiglingu. Það má ekki endurtaka sig," sagði Árni Páll.

Þá nefndi hann allt yrði að vera uppi á borði og almennar leikreglur skyldu gilda um ráðstöfun ríkiseigna.

„Eigum við að binda enda á málþófið?"

Þá talaði hann einnig um „stóra tækifærið"  - eða breytingaákvæði í stjórnarskrá Íslands. „Efni þess markar tímamót því með því verður Alþingi ekki lengur einrátt heldur fara þing og þjóð saman með valdið til að breyta stjórnarskránni. Ríkisstjórninni gefst með þessu tækifæri til að standa við fyrirheit sín í stjórnarsáttmála. Augljóslega á að hefja verkefnið með nýju ákvæði um þjóðareign á auðlindum strax á haustþingi. Við erum líka reiðbúin til að ræða grundvallabreytingar til góðs á þingsköpum í samhengi við breytingar á stjórnarskrá. Eigum við að sameinast um að veita þriðjungi þingmanna stjórnarskrárbundinn rétt til að vísa málum í þjóðaratkvæði og binda þar með enda á málþófið?"

Talaði bara um það sem ríkisstjórnin ætlar ekki að gera

Þá sagði hann að Sigmundur Davíð Gunnlaugsson, forsætisráðherra, hafi sagt margt fallegt. „En mest áberandi var það sem ekki var sagt. 21. öldin kom þar ekkert við sögu. Fortíðarþráin er svo sterk að orðið iðnaður kemur hvergi fyrir í sáttmála nýrrar ríkisstjórnar. Forsætisráðherra sagði áðan ekkert um þekkingu sem drifkraft efnahagsframfara. Ekkert um nýjar skapandi greinar sem skila okkur sífellt fleiri þekkingarstörfum. Ekkert um upplýsingatækni, sem getur bylt aðstæðum okkar til góðs. Ekkert um bættan markaðsaðgang fyrir íslenskar afurðir og þjónustu, sem er hin raunverulega forsenda aukinnar matvælaframleiðslu. Ekkert um hvernig Ísland geti þróað samskipti sín við umheiminn, heldur bara um það sem ríkisstjórnin ætlar ekki að gera,“ sagði Árni Páll.