Skjálfti 5,3 að stærð á Ítalíu

Enn heldur jörð áfram að skjálfa á Ítalíu. Um klukkan 9:30 að íslenskum tíma mældist skjálfti, 5,3 að stærð, í miðju landsins og fannst hann vel í höfuðborginni Róm og héruðunum Lazio, Abruzzo og Marche.

Skjálftinn varð á um tíu kílómetra dýpi.

Ítalskir fjölmiðlar segja upptök skjálftans hafa verið um 110 kílómetrum norður af Róm og um 35 kílómetrum frá bænum l'Aquila sem varð illa úti í skjálfta árið 2009. Þá fórust á fjórða hundrað manna og fjölmargir slösuðust.

Í frétt Independent segir að enn hafi engar fréttir borist af manntjóni eða mikilli eyðileggingu.