Tom Brady giftist ofurmódelinu Gisele

Ein stærsta stjarnan í bandarísku íþróttalífi, Tom Brady, leikstjórnandi New England Patriots, er búinn að giftast brasilíska ofurmódelinu Gisele. Þau hafa verið saman síðan árið 2006.

Athöfnin ku hafa farið fram síðastliðinn fimmtudag. Parið lét pússa sig saman í kaþólskri kirkju í Santa Monica. Athöfnin var sögð hafa verið látlaus og innileg en aðeins nánustu ættingjum var boðið í brúðkaupið.

Reyndar var þremur hundum brúðarinnar einnig boðið og vakti athygli að þeir voru með sérhannaðar Dolce & Gabbana hálsólar en brúðurinn var í kjól frá sama fatahönnuði.

Tom Brady missti nánast af öllu síðasta tímabili með Patriots en hann meiddist illa á hné í fyrsta leik og spilaði ekki meira.

Brady hefur þrisvar sinnum unnið SuperBowl með Patriots en alls hefur hann komist í úrslitaleikinn fjórum sinnum á frekar stuttum ferli.