Umfangsmestu aðgerðir í Súdan

Hjálparstarf alþjóða Rauða krossins í Súdan er lang-umfangsmesta aðgerð samtakanna. Íslendingar hafa tekið virkan þátt í starfinu og hafa fjórir Íslendingar verið sendir þangað á árinu. Stefnt er að því að senda fleiri utan á næsta ári. Átökin í Darfur héraði í Súdan hafa kostað tug- ef ekki hundruð þúsundir mannslífa og hátt á aðra milljón manna hefur misst heimili sín og hefst nú við í flóttamannabúðum sem reistar hafa verið víðs vegar um héraðið. Hjálparstarf Alþjóða Rauða krossins er viðamikið í landinu þar starfa nú um 200 erlendir sendifulltrúar og 2000 Súdanir starfa þar á vegum samtakanna. Rafn Jónsson yfirmaður flugrekstrar Rauða Krossins í Súdan, segir að starfræktar séu tvær flugvélar í farþegaflug og einnig sjái Rauði Krossinn um allt vöruflutningaflug. Fyrir utan Rafn hafa þrír Íslendingar farið til Súdans á þessu ári. Kristjón Þorkelsson hefur unnið við útvegun drykkjarvatns, Robin Bovey hefur séð um dreifingu matvæla og annarra hjálpargagna og Hjördís Guðbjörnsdóttir hjúkrunarfræðingur, hefur starfað við heilsugæslu. Rauði krossinn stefnir að því að senda fleiri Íslendinga til Súdans á næsta ári. Kristín Ólafsdóttir, verkefnisstjóri Rauða Krossins, segir þörfina mikla og stefnt sé að því að tvöfalda starfsemina í Súdan. Rafn hefur verið í Súdan síðan í september. Hann er nú heima hjá fjölskyldu sinni í jólafríi en heldur aftur utan eftir jól og verður þar til vors. Hann segir hjálparstarfið í Súdan vera erfiða vinnu. Álagið og spennan séu mikil, enda mikil þensla í starfseminni. Hann segir að vinnudagurinn sé oft á tíðum býsna langur og þreytandi.