Bjarni Guðjónsson ráðinn þjálfari Fram

Bjarni Guðjónsson hefur verið ráðinn þjálfari Fram en það staðfesti hann í samtali við Fótbolta.net rétt í þessu.

Bjarni mun hafa verið í viðræðum við Fram síðasta sólahring en hann hefur lengi stefnt að því að fara út í þjálfun.

Bjarni fékk leyfi frá KR-ingum í gær að fara út í viðræður við Fram en hann átti eitt ár eftir af samningi sínum við KR.

Bjarni, sem er 34 ára, hefur mikla reynslu af knattspyrnu og spilað meðal annars með Newcastle, Genk, Stoke, Bochum, Coventry, Plymouth Argyle, ÍA og KR en leikmaðurinn varð Íslandsmeistari með KR í sumar.