Litríkt og létt í sumar

Jarðarber og basil er skemmtileg blanda og með jógúrtís verður úr því ferskur sumar­desert. Íslensku jarðarberin eru mjög góð og líka íslenskt basil,“ segir Danis Grbic, matreiðslumaður á Grillinu á Sögu.

Hann var kokkur ársins 2016 og heldur titlinum enn, því keppni um hann var frestað þar til í september í ár, og æfir nú af kappi fyrir Norðurlandakeppni sem haldin verður 8. júní. Hann kveðst hafa lært á Grillinu og verið þar undanfarin ár.

Danis flutti hingað til lands sem króatískur flóttamaður árið 1997, ellefu ára að aldri og talar íslenskuna eins og innfæddur. Hann hefur gert sig gildandi í fótbolta, segist reyndar ekkert hafa spilað af viti síðustu fimm ár en verið að þjálfa lið sem ýmist hafi verið í 3. eða 4. deild síðasta áratug.

„Ég bjó á Ísafirði í nokkur ár eftir að ég flutti til Íslands og stofnaði liðið ásamt félaga mínum þar, aðallega upp á gamanið,“ segir hann. En við snúum okkur að matnum og tekið skal fram að uppskriftirnar eru fyrir sex til átta manns.

Fyrst er það eftirrétturinn hans Denis:

Jarðarberja- og basil-desert

1 askja fersk íslensk jarðarber

50 ml ylliblómasíróp – fæst í betri matvöruverslunum, Søstrene Grene og IKEA

20 g ferskur sítrónusafi

Skerið jarðarberin í sneiðar, setjið þau í skál og veltið þeim upp úr ylliblómasírópinu og sítrónusafanum.

Basil marens

125 g sykur

50 g vatn

75 g eggjahvítur

½ askja af íslensku basil, fínt söxuðu

Setjið sykurinn og vatnið saman í pott og hitið upp í 121°C. Setjið eggjahvíturnar í hrærivélarskál og þeytið þær á miðlungshraða. Hellið sykursírópinu varlega út í eggjahvíturnar þegar það hefur náð 121°C og aukið jafnframt við hraðann á hrærivélinni. Hrærið þar til blandan hefur kólnað niður, bætið þá saxaða basilinu varlega saman við með sleif. Smyrjið marensdeiginu þunnt á sílikonmottu eða bökunarpappír og þurrkið í ofni á 90°C í um það bil klukkustund.

Basilolía

1 hluti góð olía, til dæmis kaldpressuð repjuolía

1 hluti íslenskt basil

Blandið hráefninu saman í blandara þar til fer að rjúka upp úr skálinni. Olían á þá að hafa náð um 70°C. Sigtið síðan olíuna í gegnum síuklút og þá er hún klár.

Jógúrt- og hvít­súkkulaðiís

245 ml mjólk

50 g sykur

168 g gott hvítt súkkulaði

470 g hreint eða grískt jógúrt

3 blöð matarlím

Leggið matarlímið í bleyti í um 10 mínútur. Sjóðið saman mjólk og sykur í litlum potti þar til sykurinn leysist upp. Setjið hvítt súkkulaði í skál og bræðið það yfir vatnsbaði. Bætið síðan matarlíminu saman við sykursírópið og hrærið aðeins í þar til allt matarlímið leysist upp.

Hellið sykursírópinu yfir súkkulaðið og vinnið það saman með sleif eða töfrasprota þar til súkkulaðið nær glans­áferð. Hrærið því næst jógúrtinu saman við með písk. Setjið ísinn í kæli í tvo til þrjá tíma áður er hann er frystur.

Ef ísinn er frystur á hefðbundinn hátt er hann settur í stálskál og í frysti. Þá þarf að hræra rösklega í honum með písk á hálftíma fresti, fjórum til fimm sinnum eða oftar. Að því loknu er hægt að setja ísinn í matvinnsluvél og vinna hann aðeins. Þetta er gert til að jafna ískristallana í honum svo að ísinn verði silkimjúkur. Ísinn er síðan settur aftur í frysti. Þeir sem eiga ísvél fara eftir leiðbeiningum framleiðanda.

Svo er það hinn sumarlegi og áfengislausi kokteill vínþjónsins Axels Age Schiöth:

Óáfengur sumarspritz

2 stk. ferskt lime

10-12 stk. fersk jarðarber

5-6 stilkar ferskt fáfnisgras

¼ hluti ylliblómaessens

¾ hlutar sódavatn

Sneiðið lime og jarðarber niður og látið liggja með fáfnisgrasinu í ylliblómaessensinum í 1 klukkustund til að taka í sig bragð og lit úr berjunum. Fyllið glösin af klaka og skreytið með jarðarberjunum, limesneiðunum og fáfnisgrasinu. Hellið sírópinu yfir klakann og toppið að lokum með sódavatni og hrærið létt saman.

„Ylliblómaessens fæst í betri matvöruverslunum, meira að segja í IKEA og Søstrene Grene og hlutföllin til blöndunar eru gefin upp á flöskunum,“ segir Axel. „Svo er ekkert mál að skvetta vodka eða ljósu rommi út í þennan drykk fyrir þá sem vilja!“