Helgihald í kirkjum hefst 17. maí

Helgihald í kirkjum hefst aftur þann 17. maí og verður þá aftur hægt að halda jarðarfarir, brúðkaup, messur og aðra viðburði innan kirkjunnar.

Pétur Markan, samskiptastjóri Biskupsstofu, segir að fylgt verði sóttvarnarreglum. Ekki megi fleiri en fimmtíu koma saman og gætt verður þess að tveir metrar séu á milli kirkjugesta. Þá verður engin altarisganga.

Streymi sem nýtt hefur verið í samkomubanni verður áfram nýtt þannig að fleiri gestir en sem rúmast innan fjöldatakmarkana geti fylgst með viðburðum.

Messuhald og fermingar í Þjóðkirkjunni voru felldar niður eftir að samkomubann var tilkynnt. Ákvörðunin var tekin með almannaheil í húfi en stefnt var að því að endurskoða hana í samhengi við tilmæli stjórnvalda.