Innlent

Lög­maður World Class gerir at­huga­semdir vegna „skrítinnar fréttar“ RÚV

Sylvía Hall skrifar
Björn Leifsson er eigandi World Class. Gestur Jónsson lögmaður ritaði minnisblað til yfirvalda vegna lokunar líkamsræktarstöðva fyrir hönd Björns.
Björn Leifsson er eigandi World Class. Gestur Jónsson lögmaður ritaði minnisblað til yfirvalda vegna lokunar líkamsræktarstöðva fyrir hönd Björns. Vísir

Gestur Jónsson, lögmaður líkamsræktastöðva World Class, sendi fréttastofu Ríkisútvarpsins athugasemd í kjölfar fréttar sem sýnd var í kvöldfréttatíma gærkvöldsins. Hann segir fréttina vera skrítna, og telur jafnvel að hún sé röng.

Þar vísar hann til tölfræði um fjölda smita sem rakin hafa verið til sundlauga og líkamsræktarstöðva. Sú tölfræði sem hann gerir athugasemd við er að 36 smit hafi verið rekin til líkamsræktarstöðva en aðeins fimm til sundlauga.

Þær tölur eru þó fengnar frá smitrakningarteymi almannavarna og greindi Vísir einnig frá þeim í gær.

„Þetta er skrítin frétt. Þann 13. október sl birtist frétt um að sex einstaklingar hefðu greinst með smit sem rakið væri til morgunsunds í lauginni að Hrafnagili í Eyjafirði. Síðar barst frétt um að starfsmaður við Breiðholtslaug hefði smitast. Vel má vera að tilvikin séu fleiri. Þegar af þessari ástæðu virðist fréttin um fjölda smita í sundlaugum vera röng," skrifar Gestur í athugasemd til RÚV.

Hann segir þó að öllum líkindum vera rétt að fleiri smit hafi greinst í Reykjavík en á Hvammstanga, en þó mætti ekki draga þá ályktun að meiri smithætta sé þar. Sami annmarki væri á samanburði smita í sundlaugum og líkamsræktarstöðvum, enda færu fleiri í líkamsræktarstöðvar að jafnaði.

„Án þess að vita hve margir fara í sund og hve margir mæta í líkamsrækt er þessi samanburður algjörlega ómarktækur. Mér skilst að mætingar í líkamsrækt séu meira en þrisvar sinnum fleiri í Reykjavík en mætingar í sund.“

Sundlaugar hafa opnað aftur en líkamsræktarstöðvum er óheimilt að hefja starfsemi á ný. Sundlaugarnar fengu einnig að opna fyrr eftir samkomubann í vor og mynduðust langar raðir þegar opnað var á miðnætti. Vísir

Hafa ekki áreiðanlegan samanburð á mætingu 

Á vef World Class, þar sem athugasemd Gests til RÚV er birt, kemur einnig fram að athugasemdirnar snúi aðeins að því að málefnalega sé staðið að ákvörðunum þar sem fyrirtækjum er gert að stöðva starfsemi.

Björn Leifsson, eigandi World Class, bætir við að World Class búi ekki yfir áreiðanlegum upplýsingu um þann fjölda sem mæti í heilsurækt og sundlaugar. Þó telji hann öruggt að fleiri mæti í líkamsrækt í Reykjavík en í sundlaugar, sennilega þrisvar sinnum fleiri.

„Um smitin sem tengjast líkamsræktinni vitum við fátt. Okkur er ekki kunnugt um að neitt smit verði rakið til World Class stöðvar. Þegar smit hefur komið upp, t.d. í leikskóla, kemur fram í fréttum að gripið er til ráðstafana sem virðast felast í því að yfirvöld láta loka viðkomandi leikskóla og sótthreinsa allt áður en starfsemin hefst að nýju. Ekkert slíkt hefur komið frá sóttvarnaryfirvöldum gagnvart starfsemi World Class,“ skrifar Björn.

Hann segir World Class hvorki hafa fengið athugasemdir um sóttvarnir né fregnir af því að smit hafi verið rakið til stöðvanna. Hafi svo verið sé stjórnvöldum skylt að upplýsa stöðina um það.


Tengdar fréttir

Telur Svandísi strangari við einkageirann en hið opinbera

Gestur Jónsson, sem ritaði minnisblað til yfirvalda vegna lokunar líkamsræktarstöðva fyrir hönd eiganda World Class, segir sóttvarnaráðstafanir gerðar af ríku tilefni en allir þurfi að sitja við sama borð sem þurfi að þola takmarkanir.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.