Innlent

Fjölmargar stúlkur haft samband og sagt frá dreifingu nektarmynda á netinu

Erla Björg Gunnarsdóttir skrifar
Rebekka Ellen vill leggja sitt af mörkum í baráttunni gegn kynferðisofbeldi á netinu og hjálpa öðrum í sömu sporum og hún var í.
Rebekka Ellen vill leggja sitt af mörkum í baráttunni gegn kynferðisofbeldi á netinu og hjálpa öðrum í sömu sporum og hún var í. vísir/vilhelm

Rebekka Ellen Daðadóttir sem deilir reynslu sinni af stafrænu kynferðisofbeldi í nýjasta Kompás hefur stofnað síðu á Instagram þar sem hún vill vera til staðar fyrir aðra sem hafa lent í sömu aðstæðum og vonast til að geta búið til vettvang fyrir fræðslu.

Í Kompás er fjallað um kynferðisofbeldi á netinu, um þann mikla fjölda barna sem taka af sér nektarmynd og senda frá sér sem síðan fer í dreifingu og endar jafnvel á klámsíðu. 

Í þættinum segir Rebekka Ellen sögu sína en hún var aðeins þrettán ára þegar nektarmynd af henni fór í dreifingu um allt bæjarfélagið og endaði á klámsíðu.

Í síðustu viku stofnaði Rebekka Ellan Instagram-reikninginn Mín_eign þar sem hún hvetur ungmenni til að hafa samband og senda sér sína sögu.

„Ég átti alls ekki von á svona miklum viðbrögðum. Ég er búin að fá rosalega margar sögur frá stelpum, undir lögaldri eða sem voru undir lögaldri þegar þetta gerðist fyrir þær. Þetta eru rosalegar tölur og aðeins toppurinn á ísjakanum,“ segir Rebekka Ellen.

Hún var í viðtali í Bítinu á Bylgjunni í morgun og sagðist hafa stofnað síðuna til að opna umræðuna og halda henni gangandi svo brotaþolar þori að stíga fram.

„Lokamarkmiðið er að vera með fræðslu í grunnskólum og félagsmiðstöðvum fyrir unga krakka. Einnig að fræða foreldra og aðstandendur barna um hvernig þeir geta tekið á þessu og hjálpað börnunum. Við getum aldrei bannað krökkum að senda af sér myndir en við getum frætt þau um hversu alvarlegar afleiðingar það getur haft í för með sér ef myndin fer í dreifingu.“

Rebekke Ellen segir kominn tíma til að sníða kynfræðslu að nýjum veruleika ungmenna. Þegar hún var 13 ára vissi hún ekkert um nektarmyndir eða þá staðreynd að slík mynd gæti farið í dreifingu.

„Nektarmynd var bara eitthvað splunkunýtt fyrir mér. Enginn hafði rætt við mig um að þetta væri eitthvað sem einhver gæti beðið mig um. Þetta var ekki rætt heima eða í skólanum. Þegar ég lendi í þessu upplifi ég bara að þetta hafi verið bannað og ég var ekki að fara að segja neinum frá. Ég vildi bara að þetta myndi hverfa.“

Rebekka hvetur foreldra til að ræða sem fyrst við börnin, að þau gætu verið beðin um nektarmynd.

„Um leið og þú ert búinn að nálgast barnið þá er líklegra að barnið þori að segja þér frá því ef eitthvað svona kemur upp. Það skiptir svo miklu máli,“ segir Rebekka Ellen.


Tengdar fréttir

„Ég óska engum að lenda í þessu“

Allt niður í sjö ára íslensk börn senda af sér nektarmyndir á netinu og eru mörg dæmi um að myndirnar endi á klámsíðu. Einnig hefur málum fjölgað hjá lögreglu þar sem börn eru þvinguð af fullorðnum til að senda af sér kynferðislegt myndefni, til dæmis samneyti við yngri systkini.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.