Kári „drulluósáttur“ að vera ekki valinn í landsliðið

Kári Kristján Kristjánsson, leikmaður ÍBV, er svekktur yfir því að hafa ekki verið valinn í íslenska landsliðið sem mætir Litháen í undankeppni EM á morgun og fer ekkert leynt með það.

„Ég er drullupirraður yfir þessu. Ég neita því ekki,“ sagði Kári í samtali við Henry Birgi Gunnarsson í Seinni bylgjunni. 

„Við erum áfram að leggja inn og erum ekkert að tala um einhverjar tölur og eitthvað fjör. Bara fyrstu viðbrögð: drulluósáttur,“ sagði Eyjamaðurinn hreinskilinn að vanda.

Kári var kallaður aftur í landsliðið fyrir EM í Noregi, Svíþjóð og Austurríki í byrjun þessa árs. Hann stóð fyrir sínu á EM og átti m.a. frábæran leik þegar Ísland vann Danmörku, 31-30, í fyrsta leik sínum á mótinu.

Guðmundur Guðmundsson valdi tvo línumenn í íslenska hópinn sem mætir Litháen, Arnar Frey Arnarsson og Ými Örn Gíslason. Þeir leika báðir í þýsku úrvalsdeildinni. Öfugt við Kára spila þeir bæði vörn og sókn og Ágúst Jóhannsson telur að það sé ástæðan fyrir því að þeir voru valdir fram yfir Kára.

„Þeir eru sennilega báðir hugsaðir sem lykilmenn í varnarleiknum. Ýmir er búinn að vera okkar besti varnarmaður og Arnar hefur líka spilað vörnina úti í Þýskalandi, þessa vörn sem landsliðið er að spila og ég hef skilning á því. En það má alveg setja spurningarmerki að Kári hafi ekki verið valinn sem þriðji línumaður,“ sagði Ágúst.

Arnar Freyr leikur undir stjórn Guðmundar hjá Melsungen á meðan Ýmir leikur með stórliði Rhein-Neckar Löwen.

„Ég er búinn að sjá leiki með báðum þessum liðum og hef þá báða spila sókn. Mig grunar, eins og að Gústi er að segja, að þeir spila bæði vörn og sókn og pælingin er væntanlega að fækka skiptingum. Þetta er bara einn leikur núna og svo gæti spilað inn í þessa ákvörðun að það er langt síðan við spiluðum handbolta hérna á Íslandi,“ sagði Einar Andri Einarsson.