„Al­gjör­lega glóru­laust að ætla að setja þetta á okkar herðar“

Eigandi Sporthússins segir það „algjörlega glórulaust“ að ætla að varpa allri ábyrgð á heilsu viðskiptavina yfir á sínar herðar. Hann telur tilmæli sóttvarnalæknis um að fresta allri íþróttaiðkun og reglugerð heilbrigðisráðherra sem tók gildi í dag senda misvísandi skilaboð.

Reglugerð heilbrigðisráðherra um takmörkun á samkomum og hertar aðgerðir á höfuðborgarsvæðinu tók gildi í dag. Reglugerðin byggist á minnisblaði sóttvarnalæknis og er þar farið eftir tillögum hans í meginatriðum.

En þó ekki öllum. Sóttvarnalæknir mælist enn til þess að öllu íþróttastarfi á höfuðborgarsvæðinu verði slegið á frest næstu tvær vikurnar þrátt fyrir að reglugerð heilbrigðisráðherra heimili íþróttastarf barna, sem og íþróttir utandyra. Þetta hefur víða vakið upp spurningar, m.a. úr röðum íþróttahreyfingarinnar. Stóru íþróttasamböndin, KKÍ, HSÍ og KSÍ, tilkynntu loks í kvöld að þau hygðust fresta öllu mótahaldi næstu viku eða vikur.

Veit ekki í hvorn fótinn hann á að stíga

Þröstur Jón Sigurðsson eigandi Sporthússins ræddi málið í viðtali við Reykjavík síðdegis á Bylgjunni í dag. Líkamsræktarhluta stöðva Sporthússins var lokað strax á mánudag í samræmi við hertar aðgerðir sem þá tóku gildi á landinu öllu. 

Áfram var þó ákveðið að halda úti heima- og útiæfingum en þær voru einnig blásnar af eftir upplýsingafund gærdagsins, þar sem hertar aðgerðir á höfuðborgarsvæðinu voru boðaðar. Æfingar voru hins vegar aftur settar á dagskrá þegar reglugerð heilbrigðisráðherra var birt í gær. Þröstur sagði í Reykjavík síðdegis að staðan nú væri þrungin óþægilegri óvissu.

„Mér finnst algjörlega glórulaust að ætla að setja þetta á okkar herðar. Af því að ég er með einhverja tugi starfsmanna sem vilja fá að æfa. Þeir vilja að við veitum þessa þjónustu og ég er með einhver hundruð viðskiptavina sem vilja fá þjónustuna sem þeir eru að borga fyrir,“ sagði Þröstur.

„Þeir eru mjög ósáttir ef ég ætla ekki að veita þjónustuna og mér er heimilt samkvæmt reglugerð að veita hana. Mér er hins vegar mjög umhugað um almannahag og ég vil ekki fara gegn almannavörnum Íslands. […] En svo væri skelfilegt ef maður gerði það svo, gegn þessum tilmælum sóttvarnalæknis sem ekki eru í samræmi við reglugerð heilbrigðisráðherra, og svo kæmu upp smit hjá manni og fólk myndi veikjast alvarlega. Þannig að hvort á maður að gera? Í hvorn fótinn á maður að stíga?“

Þröstur sagði Sporthúsið jafnframt státa af góðri aðstöðu til utanhússæfinga, hvar hægt væri að framfylgja tveggja metra reglu og gott betur en það. Viðtalið við Þröst má hlusta á í spilaranum hér fyrir neðan.

Fram kemur í tilkynningu frá heilbrigðisráðuneytinu í dag að ráðuneytinu hefði þótt mikilvægt að leggja ekki bann við allri heilsurækt og hreyfingu þegar tekin var ákvörðun um hertar aðgerðir á höfuðborgarsvæðinu. Íþróttir og hreyfing sem fólk stundi utanhúss væri margvísleg og felist ekki aðeins í hefðbundnum keppnisíþróttum, heldur einnig óformlegri hreyfingu.