Lífið

Séra Hildur segir frussandi fyllibyttum til syndanna

Jakob Bjarnar skrifar
Séra Hildur Eir lætur sig ekki muna um að lesa yfir fyllibyttunum í ádrepu sem hún skrifar á Facebook.
Séra Hildur Eir lætur sig ekki muna um að lesa yfir fyllibyttunum í ádrepu sem hún skrifar á Facebook.

Séra Hildur Eir Bolladóttir skrifar ádrepu á Facebooksíðu sína en þar beinir hún sjónum að atferli og framgöngu þeirra sem hafa drukkið sig mígandi fulla. Sjálfs segist hún nú hafa verið edrú í fimm ár og það hafi tekið sig þann tíma að segja hinum fullu hvað til síns friðar heyrir.

„Af hverju er sjálfsagðara að ég drífi mig heim þegar fólk er orðið svo drukkið að það getur ekki haldið munnvatninu innan vara og frussar framan í mig í öðru hvoru orði, líka vegna þess að það er orðið ónæmt á líkamleg landamæri og stendur alltof nálægt manni?“ spyr Hildur Eir.

Hún segir að hóflega drukkið vín gleðji mannsins hjarta en öðru máli gegnir um blindfulla fólkið.

Næturlífið. Óþolandi leiðinlegir fylliraftar hafa gert það nánast ógerlegt fyrir allsgátt fólk að bregða undir sig betri fætinum, segir Séra Hildur Eir visir/kolbeinn tumi

Henni finnst gaman að fara út að skemmta sér en eftir að hún hætti að nota vín þá sé það alltaf hennar að flýja af hólmi eftir að fulla fólkið hefur hertekið stemminguna:

„Tala um starfið mitt af því að þegar menn eru orðnir fullir verða þeir umsvifalaust ofsatrúaðir og vilja með öllum ráðum koma mér í skilning um að þeir séu ekki á leið til helvítis: Þjarma að mér af því að ég nota ekki vín og spyrja stanslaust hvort ég sé ekki hress, bara af því að auðvitað get ég ekki verið mojitohress af Pepsi Max en ég get samt verið að skemmta mér og tala um áhugaverða hluti: Hella yfir mig bjór af því að bæði gróf og fínhreyfingar eru lamaðar af ofdrykkju: Tala og hlæja ofan í skemmti og tónlistaratriði þannig að listamennirnir standa niðurlægðir á sviðinu og við sem erum edrú þjáumst með þeim,“ segir prestur.

Hildur Eir telur víst að einhverjir muni taka pistli sínum sem svo að hún sé ógeðslega leiðinleg og hrokafull en hún bara nenni ekki lengur að bugta sig og beygja fyrir Bakkusi þegar hann er löngu horfinn úr lífi hennar. Hún dýrkar annan Guð og sig hafi lengi langað til að segja þetta.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.