Ekkert sumarfrí eftir jákvætt próf: Frekar súrt en skiljanlegt

Nýtt tímabil er hafið hjá landsliðsmönnunum Arnóri Sigurðssyni og Herði Björgvini Magnússyni í rússnesku úrvalsdeildinni, án þess að þeir fengju nokkurt frí eftir síðasta tímabil. Þeir voru settir í einangrun vegna gruns um kórónuveirusmit.

Arnór og Hörður fóru ásamt liðsfélögum sínum í CSKA Moskvu í reglubundið kórónuveirupróf 21. júlí síðastliðinn. Daginn eftir, á lokadegi síðasta tímabils, kom í ljós að niðurstöður úr prófum Íslendinganna voru jákvæðar. Arnór segir þó að þeir félagar hafi enn ekki fengið staðfestingu á smiti.

„Við fórum í próf daginn fyrir lokaumferðina og fengum niðurstöðuna á leikdegi. Þá var grunur um smit og þeir vildu ekki taka neina sénsa og settu okkur því í sóttkví. Við fórum svo aftur í próf einhverjum 9-10 dögum seinna, og fengum þá neikvæða niðurstöðu. Við eigum svo fljótlega að fara í mótefnamælingu,“ segir Arnór við Vísi.

Síðasta tímabil í Rússlandi dróst á langinn líkt og víðast annars staðar, vegna kórónuveirufaraldursins. Því lauk ekki fyrr en 22. júlí og Arnór kom svo inn á í fyrstu umferðinni á nýju tímabili síðastliðinn laugardag, aðeins 17 dögum síðar, í 2-0 útisigri á Khimki. Hörður missti af þeim leik vegna smávægilegra meiðsla.

Komast ekki til Íslands nema vegna landsleikjanna

„Við áttum að fá nokkra daga í sumarfrí en misstum af því út af þessu. Planið var að reyna að fara heim, þó að við fengjum ekki marga daga, þannig að það var frekar súrt að missa af því, þar sem við erum búnir að vera hérna úti síðan í maí og erum ekkert á leiðinni heim, nema í landsleikina. En staðan er bara svona í Evrópu, hún hefur ekki verið góð hér í Rússlandi og maður skilur að allir vilji fara varlega og verður að virða það,“ segir Arnór.

Hann verður væntanlega í íslenska landsliðshópnum sem á að mæta Englandi á Laugardalsvelli 5. september og Belgíu ytra þremur dögum síðar.

Eftir hlé í rússnesku deildinni frá mars og fram í júní, vegna faraldursins, gekk nokkuð hnökralaust hjá CSKA að klára mótið, að sögn Arnórs. Önnur lið lentu verr í því eins og til að mynda Rostov sem varð að láta unglingalið spila leik þar sem að allt aðalliðið var í sóttkví. Þá var Orenburg dæmt 3-0 tap í tveimur leikjum sem liðið gat ekki spilað.

„Við vorum prófaðir þegar við mættum aftur til Rússlands eftir hléið, áður en við byrjuðum svo að spila nánast þrisvar í viku. Þetta gekk alveg, en það var þétt spilað til að við næðum að klára mótið. Sum liðin hafa lent verr í þessu en önnur. Ef það kemur grunur um smit eru allir settir í próf um leið, og svo metið hverjir fara í sóttkví,“ segir Arnór.

CSKA hafnaði í 4. sæti, tveimur stigum á eftir Krasnodar og þar með afar nærri því að komast í forkeppni Meistaradeildar Evrópu. Í staðinn fer CSKA í Evrópudeildina.

„Þetta var svolítið „upp og niður“-tímabil hjá liðinu. Við byrjuðum ekki vel en náðum okkur vel á strik eftir þessa Covid-pásu, náðum í nokkuð mörg stig og vorum nálægt því að taka 3. sætið. Tímabilið hjá mér persónulega markaðist svolítið af erfiðum meiðslum sem ég lenti í fyrir áramót [frá keppni í tvo mánuði eftir að hafa rifið liðband í ökkla], en ég kom mér svo í gang eftir það og hef verið mjög góður eftir pásuna,“ segir Arnór.

Félagaskiptaglugginn skrýtinn núna

Arnór hefur leikið tvö tímabil með CSKA og vakti fljótt athygli, meðal annars með mörkum gegn Real Madrid og Roma í Meistaradeild Evrópu. Þessi 21 árs Skagamaður, sem var hjá Norrköping í Svíþjóð 2017-2018, er með samning við CSKA sem gildir til 2023 en er mögulegt að hann fari annað í sumar?

„Ég hugsa að félagaskiptaglugginn verði svolítið skrýtinn núna. Ég þarf að sjá hvað kemur upp og hvað er í boði. Mér líður náttúrulega vel hérna, en svo er spurning hversu lengi í viðbót maður á að vera. Ég er með samning til þriggja ára í viðbót en ef það kemur spennandi lið í góðri deild þá auðvitað skoðar maður stöðuna.“