Tekist á um skerðingu á hvíldartíma og aukið vinnuframlag

Formaður Flugfreyjufélagsins segir það öllum til heilla ef Icelandair bakkaði með sínar ítrustu hagræðingarkröfur gagnvart flugfreyjum og gengið verði frá nýjum samningi sem vonandi verði þá samþykktur. Boðað hefur verið til samningafundar á morgun.

Guðlaug Jóhannsdóttir formaður Flugfreyjufélagsins segir hagræðingarkröfu Icelandair snerta tugi atriða. Í megindráttum sé verið að krefjast aukins vinnuframlags fyrir sömu laun, skerðinga á hvíldartíma og breytinga á vaktafyrirkomulagi.

Er eitthvað eitt eða tvennt sem þú skynjar að hafi farið verst ofan í þitt félagsfólk?

„Ég ætla nú ekki að fara í einstök atriði. Eins og ég sagði þá eru þetta miklar breytingar á núverandi kjarasamningi. Við þurfum bara að leggjast yfir málið og skoða okkar meginn,“ segir Guðlaug.

Síðasti kjarasamningur Flugfreyja rann úr gildi hinn 1. janúar í fyrra. En kreppa Icelandair vegna Max flugvélanna truflaði gerð nýrra samninga og svo bættist ástandið vegna kórónuveirunnar ofan á það. Bogi Níls Bogason forstjóri Icelandair segir stefnt að niðurstöðu í viðræðum við Boeing í þessum mánuði.

Mynduð þið jafnvel vilja losna algerlega undan þessum samningum?

„Ekki endilega. Við teljum að þessar flugvélar þegar þær fara að fljúga aftur henti okkar leiðarkerfi mjög vel. En auðvitað verða þær að fljúga til þess,“ segir Bogi.

Tekjur Icelandair hafa hrunið eins og annarra flugfélaga undanfarna mánuði. Bogi segir að við þessar aðstæður geti félagið ekki boðið betur en gert hafi verið í samningunum sem flugfreyjur felldu með miklum meirihluta í gær.

Er þetta orðin mjög snúin staða?

„Kröfurnar voru ekki okkar. Kröfurnar um hagræðingu voru þeirra. Ég myndi halda að það væri öllum til heilla að félagið bakki með sínar kröfur og við getum þá skrifað undir nýjan samning sem yrði vonandi samþykktur,“ segir formaður Flugfreyjufélagsins.

Framtíð Icelandair ræðst af því hvort takist að safna allt að þrjátíu milljörðum króna í nýju hlutafé í byrjun næsta mánaðar. En afstaða fjárfesta ræðst síðan mikið af kjarasamningum félagsins til næstu ára.

„Það liggur alveg fyrir að öll flugfélög í kringum okkur þurfa að leita á náðir ríkisstjórna til að komast í gegnum þennan skafl sem þessi faraldur er fyrir flugfélög. Við höfum þurft að gera það líka. Það er skilyrði fyrir þessu vilyrði fyrir lánalínum frá ríkinu að okkur takist að safna hlutafé. Þannig að ef það gengur ekki eftir er það plan ekki að ganga upp. En ég er mjög bjartsýnn samt á að það takist að safna þessu hlutafé í ágústmánuði,“ segir Bogi.

Boðað hefur verið til fundar í deilu Icelandair og flugfreyja hjá ríkissáttasemjara á morgun.