Erlent

Fjármagnsflutningar til talibana taldir styðja ásakanir um verðlaunafé Rússa

Kjartan Kjartansson skrifar
Hermenn bera kistu bandarísks hermanns sem féll í árás sem talibanar eru taldir hafa borið ábyrgð á árið 2017. Rússar eru sagðir hafa lagt fé til höfuðs bandarískum hermönnum í Afganistan.
Hermenn bera kistu bandarísks hermanns sem féll í árás sem talibanar eru taldir hafa borið ábyrgð á árið 2017. Rússar eru sagðir hafa lagt fé til höfuðs bandarískum hermönnum í Afganistan. Vísir/EPA

Bandaríska leyniþjónustan hafði njósnir af umfangsmiklum fjármagnsflutningum af bankareikningi rússnesku herleyniþjónustunnar yfir á reikningi sem tengist talibönum í Afganistan. Millifærslurnar voru taldar styðja mat leyniþjónustunnar að Rússar hefðu boðið vígamönnum talibana verðlaunafé til að drepa hermenn Bandaríkjanna og bandalagsríkja þeirra.

Hvíta húsið hefur freistað þess að gera lítið úr mati leyniþjónustunnar um rússneska verðlaunaféð og vefengja áreiðanleika þess eftir að bandarískir fjölmiðlar greindu fyrst frá því fyrir síðustu helgi. Í fréttum var Donald Trump forseti sagður hafa fengið upplýsingar um verðlaunaféð í mars en ekki aðhafst neitt til að bregðast við gjörðum Rússa.

Trump forseti hefur þvertekið fyrir að hann hafi vitað nokkuð um málið og gefið í skyn að fréttir af því séu „gabb“ sem eigi að koma höggi á hann og Repúblikanaflokkinn.

New York Times hefur hins vegar eftir heimildarmönnum sínum innan bandaríska stjórnkerfisins að leyniþjónustan hafi ekki aðeins komist yfir rafræn gögn um millifærslur frá rússnesku herleyniþjónustunni GRU til talibana heldur hafi hún borið kennsl á nokkra Afgana sem hún telur tengjast aðgerðum Rússa. Einn þeirra er talinn hafa haft milligöngu um verðlaunaféð og telur leyniþjónustan að hann sé nú staddur í Rússlandi.

Upplýsingarnar um millifærslurnar eru sagðar hafa stutt við vitnisburð sem bandaríski herinn í Afganistan aflaði í yfirheyrslum yfir talibönum sem hann handsamaði. Þær hafi jafnframt dregið úr ágreiningi innan leyniþjónustunnar um trúverðugleika vitnisburðarins.

Þetta stangast á við fullyrðingar Hvíta hússins um að leyniþjónustumatið hafi verið talið standa á of veikum grunni til að tilefni væri til að upplýsa Trump um það. 

Hvíta húsið upplýst um njósnir af verðlaunafénu í fyrra

Bandarískir fjölmiðlar hafa ennfremur haft eftir heimildarmönnum sínum að upplýsingar um verðlaunaféð hafi verið að finna í skriflegri skýrslu sem Trump fær daglega um leyniþjónustu- og þjóðaröryggismál þegar í lok febrúar. Trump les slíkar skýrslur sjaldan eða aldrei. Neitanir Hvíta hússins hafa ekki verið afdráttarlausar um hvort Trump hafi fengið skriflega skýrslu um rússneska verðlaunaféð.

AP-fréttastofan greindi frá því í gær að Hvíta húsið hafi fengið upplýsingar um að Rússar kynnu að standa í aðgerðum til að hvetja talibana til að drepa bandalagshermenn í Afganistan þegar í byrjun síðasta árs. Washington Post staðfesti það hjá sínum heimildarmönnum í gær en segir að upplýsingarnar hafi þá verið taldar of óljósar til að hægt væri að byggja á þeim.

Í framhaldinu hafi þjóðaröryggisráðið fundað nokkrum sinnum vegna ásakananna. Leyniþjónustunni og hernum var skipað að afla frekari upplýsinga um verðlaunaféð áður en gripið yrði til frekari aðgerða. Afganskir vígamenn hafa haldið því fram í yfirheyrslum að Rússar hafi byrjað að bjóða verðlaunaféð árið 2018.

Leyniþjónustan telur að boðið um verðlaunaféð hafi leitt til dráps á þremur bandarískum landgönguliðum í apríl í fyrra. Farartæki sem þeir voru í var sprengt í loft upp fyrir utan Bagram, aðalflugherstöð Bandaríkjamanna í Afganistan.

Bæði rússnesk stjórnvöld og talibanar hafa neitað því að verðlaunafé hafi verið í boði fyrir að fella hermenn Bandaríkjanna og bandamanna þeirra í Afganistan.


Tengdar fréttir

Trump fékk skýrslu um rússneska verðlaunaféð í febrúar

Upplýsingar um að bandaríska leyniþjónustan teldi að Rússar hefðu heitið talibönum verðlaunum til höfuðs bandarískum hermönnum í Afganistan var að finna í daglegri skýrslu til Donalds Trump forseta seint í febrúar. Trump og Hvíta húsið hafa haldið því fram að hann hafi ekkert vitað um málið.

Rekja dauða bandarískra hermanna til verðlaunafjár Rússa

Bandaríska leyniþjónustan rekur fall nokkurra bandarískra hermanna í Afganistan til þess að rússneska herleyniþjónustan hét vígamönnum talibana fé til höfuðs þeim. Donald Trump Bandaríkjaforseti þvertekur fyrir að honum hafi verið greint frá þessu.

Trump segir fregnir af verðlaunafé Rússa vera rangar

Donald Trump, forseti Bandaríkjanna, segist aldrei hafa heyrt af því að leyniþjónusta herafla Bandaríkjanna hafi boðið vígamönnum Talibana og annarra vígahópa verðlaun fyrir að fella bandaríska og breska hermenn í Afganistan.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.