For­seti Búrúndí er látinn

Pierre Nkurunziza, forseti Afríkuríkisins Búrúndí, er látinn, 55 ára að aldri.

Í yfirlýsingu frá ríkisstjórn landsins segir að Nkurunziza hafi látist af völdum hjartaáfalls í gærkvöldi.

Erlendir fjölmiðlar segja Nkurunziza hafa fundið fyrir óþægindum eftir að hafa tekið þátt í blakleik og þá leitað aðhlynningar á sjúkrahúsi.

Nkurunziza tók við embætti forseta Búrúndí árið 2005. Mikil mótmæli brutust út í landinu eftir að hann bauð sig fram til endurkjörs árið 2015, en alls dóu 1.200 manns í óeirðum og ofbeldisöldunni sem fylgdi, auk þess að um 400 þúsund manns lögðust á flótta frá landinu.