Arsenal lagði Everton

Tvö mörk frá varnarmanninum Sol Campbell eftir föst leikatriði voru nóg fyrir Arsenal, sem lagði Everton í leik kvöldsins í ensku úrvalsdeildinni, 2-0. Campbell hefur verið lengi frá vegna meiðsla, en hefur nú svo sannarlega stimplað sig inn í liðið á ný. Mörk Campbell komu á 11. og 31. mínútu leiksins og var sigurinn Arsenal mikilvægur, en liðið hafði ekki byrjað vel í deildarkeppninni. Sömu sögu er að segja af liði Everton, en þar á bæ hefur byrjunin verið skelfileg í deildinni sem og í Evrópukeppninni.