Butt kærður fyrir kjaftbrúk

Nicky Butt, leikmaður Birmingham, hefur verið kærður af enska knattspyrnusambandinu fyrir að úthúða aðstoðardómara þegar hann var rekinn af velli í leiknum gegn Portsmouth um helgina. Butt fékk að líta rauða spjaldið eftir að Íslandsvinurinn Dermott Gallagher ráðfærði sig við aðstoðardómara, en hann var staðinn að því að sparka í einn mótherja sinna. Þegar Butt fékk rauða spjaldið, jós hann svívirðingum yfir aðstoðardómarann áður en hann fór af velli og á nú yfir höfði sér lengra bann en ella.