Fordæmalaus neyðaraðstoð

Þjóðir heims hafa heitið 320 milljörðum íslenskra króna til hjálparstarfs á hamfarasvæðunum. Aðstoð af þessari stærðargráðu á sér ekkert fordæmi og hefur komið í veg fyrir hungur og farsóttir á hamfarasvæðunum, að sögn Sameinuðu þjóðanna. Stærsta áhyggjuefnið er að tryggja að öllu söfnunarfénu verði varið í þágu fórnarlambanna. Rúmlega áttatíu lönd hafa heitið framlögum og koma hæstu upphæðirnar frá Ástralíu, Þýskalandi og Japan. Alls vilja Sameinuðu þjóðirnar að lagðir verði fram 400 milljarðar. Neyðaraðstoðin hefur gengið vel og hættan á farsóttum, sem menn óttuðust mjög, virðist liðin hjá. Jan Egeland, yfirmaður neyðaraðstoðar Sþ, segir að ekki hafi orðið vart við farsóttir eða hungursneyð því tekist hafi að ná til fólksins hraðar en nokkur gat búist við. Fulltrúara landanna funduðu í dag með fulltrúum Sþ um hvernig fénu verði sem best varið. Einnig er lögð áhersla á að vanrækja ekki hjálparstörf og aðstoð á öðrum svæðum heimsins, eins og í Darfúrhéraði í Súdan og í Tsjetsjeníu. Áður hefur komið fyrir að þjóðir hafi heitið framlögum sem síðan voru aldrei greidd. PriceWaterhouseCoopers hefur verið fengið það verkefni að fylgja eftir loforðum um framlög og rannsaka allar ásakanir um svik, eyðslu eða misnotkun peninganna. Egeland segir að Sþ hafi ekki efni á að einhver vafi leiki á því hvort þetta fordæmislausa örlæti hundruð þúsunda manna, fyrirtækja og ríkisstjórna hafi verið nýtt á árangursríkan hátt.