Misstu borðið út af frægu fólki - útskýrði málið fyrir Gordon Ramsay

„Þetta var mjög sérkennilegt, en starfsfólkið var fínt, þetta voru líklega einhverjir stjórnendur sem voru að misskilja,“ segir listakonan Herdís Stefáns sem var gert að víkja fyrir gæðakokkinum Gordon Ramsay síðasta laugardagskvöld.

Hún sat með vinkonu sinni í góðu yfirlæti á Loftinu, og segist sjálf hafa mætt sérstaklega snemma til þess að ná borðum.

Þegar það leið á kvöldið komu þjónustustúlkur til þeirra og settu miða á borðið þar sem stóð „frátekið“.

Sjálf skrifar Herdís á Facebook-síðu sína:

„þegar leið á kvöldið komu þjónustustúlkur sem þarna störfuðu, settu "frátekið" miðan á borðið okkar ásamt næstu borðum og sögðu kjánalega spenntar frá að það væri FRÆGT fólk á leiðinni og nú væru borðið frátekin... Hópurinn á næsta borði voru að halda uppá fertugsafmæli og voru ekki glöð, gengu öll út eins og hann lagði sig án þess að klára úr glösunum... Enda var okkur sagt að fara bara á barinn... því enginn borð væru laus fyrir okkur lengur, ég spurði hvort þau væru að vísa okkur frá staðnum.. en svo var ekki, við vorum meira en velkomin að vera þarna en bara þá á barnum því fræga fólkið þyrfti  sæti.“

Herdís segir að þjónustufólkið hafi ekki vitað hvaða fræga fólk var á leiðinni. Þegar Herdís og vinkona hennar voru að fara kom það þó í ljós - um var að ræða stjörnukokkin Gordon Ramsay.

Og Herdís var algjörlega ófeiminn við stjörnuna, hún heilsaði honum og kynnti sig. „Og sagði honum afhverju við værum öll að fara,“ segir Herdís og bætir við: „Ég ætla ekki að hafa eftir honum sem hann sagði, en alveg spurning hvort hann heimsæki Loftið aftur, frekar en ég eða aðrir sem þurftu að standa upp fyrir "Fræga" fólkinu“.

Herdís segir það hafa verið mikla kaldhæðni að hafa verið hálf rekin út af veitingastað sem virtist þurfa verulega á sérfræðiaðstoð Ramsay að halda, enda hefur sjónvarpskokkurinn unnið það sér meðal annars til frægðar að hjálpa veitingahúsum í vanda.

Herdís segir atvikið ekki hafa skemmt kvöldið, “við látum ekki svona rugl eyðileggja kvöldið,“ segir hún. Herdís segir raunar atvikið frekar skilja eftir sig kjánahroll heldur en nokkuð annað.